Sunday, May 8, 2011

الناس تعبانة


النهاردة هنتكلم شوية بلسان حال الناس ...الناس اللى تعبانة
وبما إننا أكيد من الناس دي ....يبقى أكيد بنتعب من اللى بيتعبهم
و لا إييييييييييييييييييييه؟؟

طب ياترى الناس تعبانة ليه؟؟
أكيد كلنا هنقول من اللى شايفينه وبنشوفه كل يوم

الناس تعبانة...لأنها بتشوف منكرات كتير في الشارع عيني عينك ومش عارفة تغيره

الناس تعبانة ...لأنها بتشوف بنات صغيرة وأطفال كمان وللأسف اندرجوا تحت فئة الكاسيات العاريات

وياعالم كمان شوية هتكون فئة إيه؟


الناس تعبانة... لأنها بتشوف طفلين أو حتى "شحطين" واحد وواحدة واقفين مع بعض
فى حتة مدارية وماسكين ايدين بعض "زي مايكونوا هيجروا من بعض"وهما مش ليهم علاقة ببعض


الناس تعبانة...لانها بتشوف أطفال ماشية والسيجارة فى "بقهم" والسلسلة في رقبتهم والالفاظ
الغريبة على لسانهم مش بتفصل


الناس تعبانة...من الجهر بالمعصية والذنب والتربية اللى ماشية على قيمة واحدة وهى
"اللاقيمة"


الناس تعبانة ...لما بتفكر فى البلد وتشوف ان مستقبلها اللى في ايد شبابها اللى المفروض يحلم
ويعيش بحلمه ولحلمه ...وبتخاف على كل الظروف اللى حواليهم


الناس تعبانة ...يوم ماتحس ان شوارع بلدها مابقاش فيها أمان على بناتهم يروحوا ويجوا زى زمان

الناس تعبانة...من انتشار الاباحية وترويج العقائد والافكار الخاطئة ومحاربة الحجاب

الناس تعبانة...لما تفكر في كل ده.. وتفكر وتقول ياترى هنتحاسب على كل ده ؟؟..لما نشوف
منكر قدام عينيا ومانحاولش نغييره ونسكت فى لحظتها

الناس أكيد تعبانة من كل ده ...واحنا من الناس ...فياترى ايه موقفي لما اشوف كل ده
ومش احاول إنى اعمل حاجة؟؟؟

وبعد كل ده ...بردوا تلاقي اللى لسه بيقول ياعم وأنا مالي خليني فى حالي ..هوه انا اللى
هصلح الكون

ايوووووووه ..أنا وأنت اللى هنصلح الكون
ع الاقل المكان اللى انت عايش فيه "بيتك" عيلتك ،اصحابك
لو كل واحد فينا عمل كده الكون هيتصلح وكل واحد يبدأ بنفسه
وماحدش يقول وأنا مالي..لأن العمل الإيجابي في أي مكان مش صعب
عمل الخير مش مستحيل...مادام بنعمله وواثقين انه صح
الصح اللى ربنا "سبحانه وتعالى" قال اننا لازم نعمله واكيد هنقدر نعمله

ونعلم غيرنا ازاى يعمله

لو نبطل نقول وأنا مالي... مش عارفة ومال هيبقى مالنا امتى بس؟؟

أكيد هنقابل ردود أفعال مش كويسة ومش ترضينا... بس ده بردوا أكيد مش نهاية الكون
ولازم نعرف إن الناس كلها مش زي بعضها

بس نجرب

كل حاجة لما بنيجي نعملها أول مرة بتبقى صعبة ..لكن بعد كده هنحس انها حاجة سهلة وبسيطة

نجرب

نثق في الله عز وجل ...أولا
وفي قدراتنا ونفسنا ...ثانيا
ونبطل نقول" ياعم وأنا مالي"

بس نجرب ...وبإذن الله

نلاقي بلدنا كلها زي ما نحـــــــــــب تكـــون

3 comments:

ياسر سليم said...

إن شاء الله بلدنا تتقدم طول ما فيها ناس بتغير عليها وشايلة همها
وأظن أن السلبية بدأت تقل في المجتمع المصري إن لم تكون قربت على الإختفاء .

Anonymous said...

العمل لدين الله عزوجل والغضب عند رؤية المعصية من سمات المؤمنين
اللهم أجعلنا من اهل الايمان وممن يحملون هم دينك
صلي علي النبي

حنعيش يعنى حنعيش said...

تسلم ايدك .. وعقلك