مين اللى بيتغير؟؟

أكيد كل واحد فينا في حاجات كتير جواه وحواليه نفسه يغيرها أو حتى يفهمها ودايما بنسعى

إننا نعرفها ونغيرها... ممكن نكون عارفينها وممكن تكون تايهة منا ...وبنقنع دايما نفسنا إن التغيير ده حاجة سهلة وبسيطة قوى

التغيير .....كلمة في ظاهرها سهل جدا ...بس ياترى هيا فعلا سهلة ولا صعبة؟؟؟

ولما بيبقى نفسنا نغير حاجة بنقدر ولا لأ؟؟

طب ياترى لو الحاجة دى "نفسك".... هيبقى سهل علينا اننا نغيرها؟؟؟

الانسان بطبيعته بيمر بمراحل كتير من اول مابيتولد لحد مايموت ...كل مرحلة بيكون فيها تغييرات كتير عشان يقدر إنه يواصل ويتعايش مع كل مرحلة فيها

في منها بيكون تغييرات طبيعية ...يعنى حاجة كده مالناش دخل فيها ومانقدرش كمان نتحكم فيها

لكن ... في أوقات كتير بتيجي على الانسان ممكن يحس انه مش مرتاح مع نفسه

نفسه يعمل حاجة في حياته أكتر...أو نفسه يتخلص من شئ معين في حياته ..أو في شخصيته

حاجة ممكن تكون مش عاجباه ...رغم إنه ممكن قوى يكون اتعود عليها والناس كمان اتعودت منه عليها

ومش شرط طبعا ان الحاجة اللى عاوز يغيرها تكون صفة وحشة... لأ.. بس هيا صفة

فيه ومش عاجباه

وساعات بردوا تكون صفة هوه عارف انها مش حلوة ...بس بردوا مش قادر انه يغيرها

أكتر حاجة بتحير الانسان انه يفكر هوه جواه ايه؟ وعايز ايه؟ ومش يعرف يرد

فياترى التغيير في الوقت ده بيبقى صعب ولا سهل؟؟؟

يعنى فعلا ممكن انه يتغير ولا مش هيقدر؟؟

أكيد فى الوقت ده الانسان بيكون مضغوط من ناحيتين......

الاولى: الناس اللى حواليه... واللى عايزة تشوفه كده وبالصورة دى

التانية: نفسه..... اللى بردوا عايز يشوفها بالصورة التانية

ويبدأ الانسان يحس انه بقى بشخصيتين

ويلاقي نفسه اتنين مش واحد...واحد عايش معاه وجواه...وواحد تاني عايش براه

طب ليه مانكونش حاجة واحدة؟؟ ويبقى بره زي جوه؟؟

ليه بندور على قناع نلبسه قدام الناس؟؟

وطبعا في اللى عنده الف قناع وقناع

بس دول اكيد مش مرتاحين...الراحة عمرها ماتيجي واحنا مش عارفين احنا مين

ومش عارفين نبقى واحد وبنعيش اتنين مش واحد

وطبببببببببببببعا رغم ان كلنا عارفين انك لايمكن هترضي الناس....إلا إنهم بيكون ليهم أكبر الاثر في التغيير ده

والدليل على كده ...إننا بنلاقي ناس اكتسبت صفات جديدة مش فيها ...بسبب تأثرها بناس معينة

وناس ممكن تتغير في بعض الصفات... بسبب الناس

وناس كتير ممكن ماتقدرش تتغير ...بردوا عشان الناس

عشان كده بقى....هل فعلا التغيير ده دوامة كبيرة ؟؟

كل اللى بيدخل فيها بيبقى عاوز يتغير ..وبيفضل دايما عاوز يتغير...وممكن فعلا يحس انه اتغير

ولا ... الحقيقة
:

:

إن الحياة هيا اللى بتتغير من حوالينا

ياترى احنا فعلا بتغير ولا الحياة هيا اللى بتتغير ؟؟

يعنى احنا بافكارنا وحياتنا كلها بتتغير وتغير فينا ولا مين اللى بيغير في مين ؟؟

ماتيجوا نحلم

***مساكم سكر زيادة***

أنا جاية النهاردة وعايزة كلنا نعمل حاجة كده مع بعض ... متفقين ....ايه رأيكم كل واحد فينا كده يبدأ يقول هوه نفسه في ايه؟؟

بجد والله مش هزار.. ماتيجوا نحلم .... أظن ان الحلم مش حرام ولا ايه ؟ولا يمكن هيحرمونا من الحلم كمان اه ماهوه ده اللى ناقص يعملوه؟؟

وعشان كده بقى ......يلا نحلم

تعالوا نغمض عيونا عن الواقع ده كله ..و نحلم ببكرة... ونحلم بحياتنا هتكون ازاي بعد 20 سنة من دلوقتي

"وماحدش يقولي ياستى خليها ماشية كده يوم بيوم"

انا بقووووووووووول نحلــــــــــــــــــم

مجرد حلم ياناااااس ونشوف ايه اللى نفسنا نكون وصلنا له بعد 20 سنة

ايه اللى نفسنا يكون موجود فى حياتنا ومش موجود دلوقتي؟؟

ايه اللى نفسنا انه يتغير حوالينا ومش يكون له أثر بعد كده؟؟

ايه الحاجات اللى ممكن تكون أفضل من دلوقتى..وازاى ؟؟

وايه اللى ممكن يكون أسوأ؟؟

طب وايه اللى ممكن نعمله عشان نكون زى مااحنا عاوزين؟؟

ياترى كمان 20 سنة هنكون ازاى وبلدنا هتكون وصلت لايه؟؟

احنا نفسنا هنكون وصلنا لايه ياترى هنكون زى مااحنا"محلك سر" ولا هنكون احسن

ولا ممكن نكون اسوأ؟؟

ياترى عاوزين نكون ايه.. وازاى.. وليه؟؟

يعني بجد لو كل واحد اقعد وفكر فى كل الحاجات اللى نفسه فيها

أو حتى حاجة واحدة بيحبها ويقول هوه نفسه تكون ازاى بعد 20 سنة

نفسك تكون ايه بعد ال20 سنة دول؟؟

والأهم من كده

ايه اللى انت بتعمله دلوقتى عشان تكون تقدر توصل للى نفسك فيه وبتحلم بيه؟؟

"ااااااه خدوا بالكوا ماهيا مش احلام وخلاص يعني لازم نعمل عشان نوصلها"

وياترى احنا متفائلين ولا الوضع اللى احنا فيه مش مدينا فرصة اننا حتى نحلم ؟؟

بجد ياجماعة البوست ده مش مجرد احلام وخيالات بس احنا فعلا لو فكرنا كده وكل واحد فكر في اللى نفسه فيه ممكن بجد نتغير

لو كتبنا أحلامنا دي قدامنا هيكون أفضل بكتير لان ساعتها هنحس أنها مش خيال

ونقدر نشوفها ونسعى لتحقيقها

انا عايزة بجد كلنا نكتب لأنها مش مجرد احلام هنقولها ..لأ...دى فعلا ممكن تكون

بداية عشان نعرف احنا عاوزين ايه؟؟

وعاوزين نوصل لفين؟؟

على جميع المستويات..شخصي..عائلى ..اجتماعى..ثقافي..عملي..الحياة عامة

مين عارف ..يمكن نقدر نغير حاجة لما نشوف أحلامنا وأمنياتنا قدام عينينا

ويمكن بردوا ساعتها نقدر نحدد نقطة البداية بالظبط

اللى بيها نقدر اننا نبدأ في تحقيق الاحلام دى

انا مش بقول كده عشان كل واحد يكتب كل حاجة عنه وعن احلامه لان طبعا اكيد كل واحد فينا بيحلم بحاجات كتييييييييير قوى ونفسه انه يتغير.. ويغير.. ويكون له هدف في الحياة

بس انا نفسي بجد اننا نحلم ...ونخرج كل اللى جوانا قدامنا

ونبدأ نشوف ايه اللى المفروض نعمله من دلوقتى عشان نقدر نحقق الاحلام دى

يمكن فعلا تتحقق ونقول ....ياااااااااااه ده كان حلم بعيد قوى عننا وكان صعب تحقيقه

مين عارف...مفيش حاجة بعيدة عن ربنا بس نجرب نحلم وتفائل مهما كانت الظروف

"وما ذلك على الله بعزيز"

أهي رومانسية وخلاص

ياااااااااااااا..أخيرا هكتب حاجة وهرجع للمدونة....بجد مش مصدقة...أصل المشكلة إنى مش عارفة أنا ليه مش كنت بكتب...بس اللي أعرفه إنه إحساس صعب قووووى لما تكون دماغك كلها أفكار نفسك تقولها وتتكلم فيها ومش قادر حتى إنك تتكلم وإن كله ملغبط في كله....وإنك حتى لو إتكلمت وقولت ماحدش هيفهم كلامك غيرك......يلا خيييييير والحمد لله على كل حال

يلا ما عليكوا ...

سيبكوا من كل اللى فات ده أهم كانوا كلمتين متعبين وعايزة أقولهم واستحملوني انتوا بقى...وبجد بشكر كل اللى سأل عليا الفترة دى ربنا يكرمكم يارب

:

أنا بقالي فترة كده ملاحظة حاجة أو ظاهرة غريبة إلى حد ما ...حاجة مش عارفة هيا حلوة ولا وحشة

"بس أنا من جوايا عارفة ومتأكدة إنها حلوة وجميلة كمان"

طبعا كلكم هتقولولي ومال بتسألي ليه؟؟؟

هقولكم لأني لاحظت استنكار ناس كتير ليها في نفس الوقت اللى في كتير بيحب أنه يتوصف بنفس الحاجة

وناس تالتة مش فارقة معاها..... بس كل اللى بتعمله إنها بتسخر منها ومن اللى بيتكلم عنها

زى ماتكون حاجة كده مش ولابد لاسمح الله

طيب ندخل في الموضوع مرة واحدة من غير ألغاز ومقدمات كتيرة .....

يعني إيه رومانسية؟؟؟

تشششتتششششش..تشششششششش

سؤال بدأت ألاحظ انه مالوش إجابة أو ليه بس اجابات مختلفة قوى ...ليه كتير من الناس دلوقتي يحبوا يقولوا على نفسهم انهم رومانسيين؟؟

وليه فى ناس تانية بتسخر منها؟؟

وناس بتزعل قوي لما حد يوصفها بأنها رومانسية؟؟

وناس بتتكسف من ده زى مايكون إتهام موجهة لهم؟؟..وناس..وناس

طب هل الرومانسية دى كلمة كده زي باقي الكلمات... ليها مفهوم معين ونقدر نقول انها كذا وكذا....؟؟؟

ولا هيا عبارة عن إحساس مينفعش نعرفه أونقوله؟؟؟

اللي انا اعرفه ولاحظته بردوا إن الرومانسية دي بتختلف من شخص للتانى ...بتختلف في معناها بالنسبة له...بتختلف في طريقة التعبير عنها....بتختلف في طريقة فهمها والاحساس بيها

يعني في ناس بيعتبروا الرومانسية دى جو معين وكل واحد بيخلق الجو بتاعه وبطريقته

وده طبعا صح وسليم

وفي ناس الرومانسية بتاعته زي رومانسية زمان"زى ما بيقولوا عليها دلوقتى" شموع وورود وهدوء

وده نوع ناس كتير بقت تقول إنه ملوش وجود دلوقتى في زحمة الحياة اللى بقينا فيها

"بس يلا هنعمل إيه ادينا بنحلم لو بطلنا نحلم هنطق" :)

وفى ناس الرومانسية عندهم في الكلام... وبيكتفوا بيه جدا وتكون الكلمات دى بالنسبة لهم هي كل دنيتهم

و ناس الرومانسية بالنسبة لهم مجرد إحساس بيوصل لوحده للقلب... بمجرد انه يحس بحنان وعطف اللى قدامه فده لوحده كفاية جدااااا

وفي ناس تانية الرومانسية عندهم أفعال يعنى يحب دايما إنه يلمس الرومانسية دى ...بس الحمد لله أعتقد

إن النوع ده مش منتشر قوى...لأنه بصراحة مش حلو ومش دايم الاحساس بيه

وطبعا ده على عكس ناس تانية كتييير ممكن تكتفي بنظرة مش أكتر..وفي...وفي ..وفي

ومش معنى الرومانسية.. من وجهة نظري البحتة... ان الانسان يغلب العاطفة على العقل ابدا...لكن انه يكون إنسان حساس عقلاني..إنسان متصل بعواطفه وحسه مع عدم تغيب العقل أكييد

:

:

طيب كل الحالات اللى فاتت دى... الرومانسية... فيها دايما لو تلاحظوا مرتبطة بشخص تانى

طب لو مفيش الشخص ده .....إيه اللى هيحصل؟؟

يعنى ماينفعش نكون رومانسيين في حياتنا ؟؟

مع أهلنا وأخواتنا وأصحابنا وحبايبنا؟؟؟

طب لو أنت أوانتى شايفين نفسكوا رومانسيين انتوا رومانسيين ليه؟؟؟

يعنى إيه الاختلاف اللى بينك وبين الشخص العادي من وجهة نظرك؟؟؟

وهل فعلا تحب أنك تتوصف بكده ولا ماتحبش؟؟؟

وليه بقى في ناس كتير بتسخر من الرومانسية ومن المشاعر الجميلة ووجودها بين الناس أيان كان

طرفى الموضوع وإعتبارها نوع من المبالغة أو الأحلام ؟؟

مع إقتناعي التام بإختلاف المفهوم من شخص لآخر وإختلاف طرق التعبير عنها

وكذلك إختلاف أهميتها عند الكثير من الناس؟؟؟

والله مش عارفة بقى... بس اهي كلها رومانسية حلوة وخلاص

كلاهما فراق...فلتختار ماشئت

كثيرا ما ينتابنى شعورغريب..وهو الفراق ...وأنا أتخيل كل من حولي بعد موتي؟؟

هل سيذرفون الدمع لفراقي؟؟

هل سيفقدون وجودي بينهم؟؟

هل بعد مرور سنوات على وفاتي ...يتذكرونى؟؟

أم الحزن سيكون لمجرد ثلاثة أيام ...ثم يختفي الحزن على فراقي وكأني لم اكن معهم يوما ما

عندما يأتي العيد ...هل سيختلط فرحهم بالحزن لمجرد انني لست معهم؟؟

هل سيفقدون روحي وستختفي كما يفقدون جسدى وتمتلكه الأرض؟؟

جميعنا لهذا اليوم راحلون ..ولكن ..لنقف قليلا مع انفسنا ونتصور ..ماذا سيحدث وماهي ردود أفعالهم

من بعدنا؟؟

***أمي**

التي حملتني 9 أشهر وسهرت على راحتى ستتفاجأ من الخبر.. ستكذب الخبر ملايين المرات ..حتى تقتنع

ستتذكرنى حتما كثيرا..ستفقد الطفلة التي مهما كبرت فهي طفلة فى نظرها

ستفقد الطفلة التي أعتادت كل يوم على ضمها.. وتقبيلها ..والدعاء لها

ستفقد دلوعتها.. وصديقتها.. وابنتها.. والهدية التي وهبها الله لها

ستفقد طيشي الذي تعدى حدوده

عذرا

:

لا أستطيع التكملة ..فأمي الوحيدة التي لا أجد ما يعبر عن فجيعتها

***أختي***

الحضن الذي ألجأ إليه كلما أحسست برغبة البكاء والارتماء..ستبكيني كثيرا حتى يخيل للناس أنها فقدت دموعها للأبد..ستعود إلى السرير الذي طالما حضن أجسادنا..ستبحث عني..ستبحث عن أحلامي

ولن تجد سوى دمعة سقطت ذات ليلة تخاصمنا فيها سويا

فلاتبكي أختي..ستكملين الطريق بدوني وتسعدين بتحقيق أحلامي ..لن اكون معك

فالله تعالى كتب أن لا أشهد هذا اليوم....ولا إعتراض على قدر الله

***صديقتى ونصفي الثاني***

ستبكي كثيرا لفراق أخت لها مسكت بيدها حين.. حالت للسقوط

أهداتها فرحا حين ..أدمنت الحزن

منحتها الراحة حين..صادقت التعب

سينتهي كل لقاء..وتنتهى كل ضحكة...وتنتهي الحياة

ستبكي وتبكي....وتتوقف لديها الحياة لفترة... وتستمر بعدها

وحينها.... ستكتشف أنني مجرد عابرة تستحق أن يدعى لها بعد موتها

***أحدهم ***

حين يسمع خبر موتي ..سيضحك ويفرح ويحمد ربه كثيرا!!!وليس بعيدا أن يحيي إحتفالا بمناسبة موتي

وسبب سعادته...هو تخلصه من الانسانة التي عانى طوال حياته وهو يريد أن يكون مثلها ..لكنه لم يستطيع

حقد ...غيرة... حسد... قلب أسود... كره... مكونات أساسية في شخصيته

فأنا كنت صخرة في طريقه"هو من توهم وجودي في طريقه" والآن انزاحت عنه تلك الصخرة

فأصبح سعيد

" كل نفس ذائقة الموت"

سنرحل ونبقي من خلفنا أب.. وأم.. وأخ.. وأخت ..وصديق.. وحبيب يبكينا

فكم من مرارة خلفناها بفراقنا لهم...يبكونا كثيرا لرحيلنا ..ونطمع بدعواتهم لنا

فهل سيحزنون على فراقنا ؟؟

هل ستبقى كلماتنا وحروفنا محفورة بذاكرتهم ؟؟

هل سنترك لهم أثرا طيبا يبقون عليه؟؟

أم سترحل أرواحنا..كما ستذهب أجسادنا وتصبح ملكا للأرض؟؟

فلأكن ولتكن ..فرد نافع صاحب أثر حميد في أى مكان وأى زمان... ولا تكن إنسان فض يكره الآخرين وجوده ومكوثه معهم ويتمنون موته؟؟

ولنتذكر دائما ذلك اليوم ..وما اعددنا له...وما سينتفع به من خلفنا...وأي الأحوال نرتضيها لنفوسنا....ومن أجلها.....فلنعمل..فما الحياة الا ساعات وثواني؟؟؟؟

الله اسأل أن يرزقنا الإخلاص في القول والفعل

وأن يرزقنا حسن الخاتمة وحسن العمل

ويرزقنا مصاحبة أولئك في الجنان

على سرر متقابلين ومنابر من نور