Friday, May 30, 2008

مين اللى بيتغير؟؟



أكيد كل واحد فينا في حاجات كتير جواه وحواليه نفسه يغيرها أو حتى يفهمها ودايما بنسعى

إننا نعرفها ونغيرها... ممكن نكون عارفينها وممكن تكون تايهة منا ...وبنقنع دايما نفسنا إن التغيير ده حاجة سهلة وبسيطة قوى

التغيير .....كلمة في ظاهرها سهل جدا ...بس ياترى هيا فعلا سهلة ولا صعبة؟؟؟

ولما بيبقى نفسنا نغير حاجة بنقدر ولا لأ؟؟

طب ياترى لو الحاجة دى "نفسك".... هيبقى سهل علينا اننا نغيرها؟؟؟

الانسان بطبيعته بيمر بمراحل كتير من اول مابيتولد لحد مايموت ...كل مرحلة بيكون فيها تغييرات كتير عشان يقدر إنه يواصل ويتعايش مع كل مرحلة فيها

في منها بيكون تغييرات طبيعية ...يعنى حاجة كده مالناش دخل فيها ومانقدرش كمان نتحكم فيها

لكن ... في أوقات كتير بتيجي على الانسان ممكن يحس انه مش مرتاح مع نفسه

نفسه يعمل حاجة في حياته أكتر...أو نفسه يتخلص من شئ معين في حياته ..أو في شخصيته

حاجة ممكن تكون مش عاجباه ...رغم إنه ممكن قوى يكون اتعود عليها والناس كمان اتعودت منه عليها

ومش شرط طبعا ان الحاجة اللى عاوز يغيرها تكون صفة وحشة... لأ.. بس هيا صفة

فيه ومش عاجباه

وساعات بردوا تكون صفة هوه عارف انها مش حلوة ...بس بردوا مش قادر انه يغيرها
أكتر حاجة بتحير الانسان انه يفكر هوه جواه ايه؟ وعايز ايه؟ ومش يعرف يرد

فياترى التغيير في الوقت ده بيبقى صعب ولا سهل؟؟؟

يعنى فعلا ممكن انه يتغير ولا مش هيقدر؟؟


أكيد فى الوقت ده الانسان بيكون مضغوط من ناحيتين......

الاولى: الناس اللى حواليه... واللى عايزة تشوفه كده وبالصورة دى

التانية: نفسه..... اللى بردوا عايز يشوفها بالصورة التانية

ويبدأ الانسان يحس انه بقى بشخصيتين


ويلاقي نفسه اتنين مش واحد...واحد عايش معاه وجواه...وواحد تاني عايش براه

طب ليه مانكونش حاجة واحدة؟؟ ويبقى بره زي جوه؟؟

ليه بندور على قناع نلبسه قدام الناس؟؟
وطبعا في اللى عنده الف قناع وقناع

بس دول اكيد مش مرتاحين...الراحة عمرها ماتيجي واحنا مش عارفين احنا مين

ومش عارفين نبقى واحد وبنعيش اتنين مش واحد

وطبببببببببببببعا رغم ان كلنا عارفين انك لايمكن هترضي الناس....إلا إنهم بيكون ليهم أكبر الاثر في التغيير ده
والدليل على كده ...إننا بنلاقي ناس اكتسبت صفات جديدة مش فيها ...بسبب تأثرها بناس معينة

وناس ممكن تتغير في بعض الصفات... بسبب الناس

وناس كتير ممكن ماتقدرش تتغير ...بردوا عشان الناس

عشان كده بقى....هل فعلا التغيير ده دوامة كبيرة ؟؟

كل اللى بيدخل فيها بيبقى عاوز يتغير ..وبيفضل دايما عاوز يتغير...وممكن فعلا يحس انه اتغير

ولا ... الحقيقة
:
:

إن الحياة هيا اللى بتتغير من حوالينا


ياترى احنا فعلا بتغير ولا الحياة هيا اللى بتتغير ؟؟

يعنى احنا بافكارنا وحياتنا كلها بتتغير وتغير فينا ولا مين اللى بيغير في مين ؟؟

at

58 comments:

  1. AnonymousJune 2, 2008 at 12:55 AM

    والله يا استاذتنا موضوع جميل
    بصي يا ستي التغير ده فعلا علي المستويين المستوي الشخصي والحياة من ناحية تانية
    بس اللي انا اعرفه ان كل واحد فينا بيكون عايز يتغير للاحسن وبيسعي ليه بس اللي بيغير من نفسه ده لازم يكون عنده اصرار وعزيمة وعنده هدف للتغيير
    اما الحياة ففعلا هي بتتغير وكل شوية بنكبر ومتطلباتنا بتكبر واللي عايزينوا بيكتر بمعني ادق الحياة في تغير مستمر واحنا جزء من هذه الحياة
    المهم ان اللي عايز يتغير يكون عايز يتغير لشخصه ولرضا ربه مش للناس
    لان اللي بيتغير عشان الناس مش بيكون اسمه تغير ممكن نسميه رضاء الناس او طاعة لشخص لكن ده مش هينفع لان لو اللي اتغير عشانه ده راح كل اللي اتغير ده هيروح عشان اللي اتغير عشانه راح
    التغير لابد له من اصرار وعزيمة قوية
    اسف للاطالة
    جزاكي الله خيراً
    تقبلي مروري

    ReplyDelete
  2. صاحب المضيفةJune 2, 2008 at 1:31 AM

    كلامك مظبوط جدا يا أماني


    ايه يا اخواتي العيلة الجامده دي

    كلها علماء ومفكرين


    يارب ديمها علينا نعمة يارب


    تعرفي ان في ناس كتير من الناجحين تغيروا بالشكل ده


    لانهم تحدوا كل اللي حواليهم من اللي بيسفهوا رأيهم علشان يثبتوا لهم انهم ناجحين



    تحياتي وشكرا على الموضوع الجميل ده

    ReplyDelete
  3. فاتيماJune 2, 2008 at 6:07 AM

    أماااانى
    إنتى مخولتنى يا بنتى
    طب عاوزة أفكر شوية قبل ما اجاوب
    ممممممم
    بصى يا ستى
    الإنسان مبيتغيرش و لا حاجة زى مانتى متصورة
    كل الحكاية إنه بيتولد فى بيئة ما و لها قوانينها و قواعدها
    يكبر هوه و هوه عمال يحاب فى القوانين دى عشان يكسرها و يعمل اللى نفسه فيه ميقدرش
    و إن قدر ميعرفش عشان اللى حواليه هيطينوا عيشته
    او هو اللى هلخبطلوهم حياتهم
    فيتراجع
    و يحاول يتكيف مع الواقع و الظروف
    و اللى كان مبيقبلوش و ميعجبوش زماااان
    بيبتدى يتقبله و يتعود عليه و موش بعيد يحبه
    و دا اللى بنقول عليه مجازاً
    دا نضج فكرياً
    دا خلاص وصل لحالة من الرضا
    دا ربنا هداه و عقل
    إحنا كبرنا بقى على شغل العيال ده
    و القصد إننا إتغيرنا
    و إحنا لا إتغيرنا و لا حاجة
    إحنا أتعلمنا بس نتحايل على الدنيا و نعرف نعايشها بكل ما فيها
    تنهيدة طويلة
    و صمت
    تقوليلى إيه يا فاطمة الكلام الكبير دا أقولك أهو أى كلام فى الهجايص و خلاص
    عشان أوهمك إن عندى نظرية بخصوص موضوع التغيير اللى بتقولى عليه
    إكمن أختك الكبيرة - أنا - اول واحدة فى الكون موش عارفة أتغير بسهولة
    تحياتى يا امانى
    و وحياة أغلى ما عندك
    بلاش الأسئلة العميقة دى عشان بتنح قصادها قوى ....

    ReplyDelete
  4. جمعاوىJune 2, 2008 at 8:53 AM

    حضرتك سألتى مين اللى بيتغير

    إحنا ولا الدنيا


    أقول لحضرتك


    الإتنين

    !!!

    ReplyDelete
  5. FahdJune 2, 2008 at 9:47 AM

    من الذي يتغير

    طبعا كل شيء يتغير
    ولكن سنن الحياة لا تتغير
    هي ثابتة


    اما من الذي يجب ان يتغير

    فهو انت

    من يجب ان يتغير ولا ينتظر الدنيا تتغير حوله

    ولكن اذا قررت ان اتغير وعزمت واستطعت فلا يهمني الناس

    سوف اتغير حتي وان اعترضوا

    حتي وان زموني

    تعرفي النقطه دي تظهر اكترر لما واحده عايزة تتحجب لكن عائلتها او صحباتها مش محجبات الموضوع بيقي صعب

    او شاب عايز يلتزم

    لكن يستعن بالله ولا يعجز

    وجميل قوي اننا ندي نفسنا فرصة من الحديث ميبقاش كله عن الحكومة بنت الذين والفساد

    ميبقاش كله ضرب ضرب

    وجزاكم الله خيرا

    ReplyDelete
  6. AnonymousJune 2, 2008 at 10:13 AM

    جزاكم الله خيرا عن موضوعاتك التى تتسم بترابطها الشديد بالواقع الملموس وغير الملموس الحقيقه ان الانسان الطموح لا يرى الا هدفه ودائما يسعى اليه ولكن لا بد ان يجد المرء شيئا ينغص عليه معيشته وزى ما بيقولوا يطلعله فى كل خرابه عفريت انا مثلا انسان طموح بس بشكل جنونى كاد فى وقت من الاوقات ان يودى بحياتى الايمانيه لولا فضل الله علينا وفى نفس الوقت لى ظروف معينه تجبرنى ان اتخذ خطوه تجعل اتجاهى المالى والفكرى بها هو الشى الاساسى ولذلك قام صراع داخلى بينى وبين نفسى ان اكون كما اراد من حولى نتجه لظروفى التى ليس لى يد فيها وبين ان اكون ذلك الشخص الذى يتمنى ان اكونه فربنا يرحمنا وينجينا من الانفصام فى الشخصيه

    ReplyDelete
  7. بنت أبيهاJune 2, 2008 at 10:24 AM

    التغيير مرتبط اكثر بالانسان

    فالانسان هوه الذي يخلق جو الحياة من حوله

    وهذا الجو الذي يخلقه الانسان كل شخص يساهم في هذا

    يجل الانسان نفسه يتأثر بهذا التغير في الحياة من حوله

    فيغير من نفسه ليمتزج ويتعايش في هذه الحياة

    وهكذا تدور الدائرة

    ReplyDelete
  8. عًٍمًرٌٍوٍ آلنْوٍبٌَِىJune 2, 2008 at 6:28 PM

    السلام عليكم

    البوست بصراحة جميل جداااااا
    وموضوع التغيير ده فعلا موضوع مهم ويمكن بيشغل بال كل واحد فى الدنيا
    الانسان الى مش راضى عن نفسو بيكون نفسو يتغير والانسان الى راضى عن نفسو برضو عايز يتغير ويكون احسن واحسن ودى طبيعة البشر بس التغيير ده فعلا محتاج اراده وعزيمة من حديد علشان نقدر نتغير واكيد هتقابلنا تحديات كتير من الناس الى حوالينا لان مش كل الناس الى هترضى بده
    وانا بأيد رأى الاخوه الى قالو ان الحياة واحنا بنتغير فى نفس الوقت بس مين بيأثر على مين دى بترجع للشخصية نفسها

    تحياتى ليكى واشكرك كل الشكر على الموضوع الجميل

    واتمنى انك تشرفى المدونة بتاعتى المتواضعة
    امضاء
    رئيس جمهورية اسوان العربية

    ReplyDelete
  9. آخر العنقودJune 2, 2008 at 9:40 PM

    محمود

    اكيد طبعا كل واحد بيكون عاوز يتغير بيبقى للاحسن وده فعلا محتاج لعزيمة واصرار كبير جدا وهدف واضح قدامه
    عشان يقدر يوصل ويتعايش مع الحياة وتتطرها السريع حواليه


    لان لو اللي اتغير عشانه ده راح كل اللي اتغير ده هيروح عشان اللي اتغير عشانه راح

    حلوة قوي الجزء ده فعلا
    لانى بلاحظه فى ناس كتير يكونوا فعلا اتغيروا بس بمجرد ذهاب سبب التغيير وهوه بيكون شخص ما بتبدأ تحس انه رجع تانى زى الاول

    يبقى فى الاخر لازم نتغير للافضل ولرضا ربنا عزوجل لان الحياة بكل مافيها بتتطور واحنا جزء من هذه الحياة

    تحياتى ليك
    وجزاكم الله خيرا...منورانى دايما

    ReplyDelete
  10. آخر العنقودJune 2, 2008 at 9:43 PM

    ابومالك..صاحب المضيفة

    كلامك مظبوط جدا ياانس
    :))
    فعلا ده نوع من انواع التغيير وده طبعا بيكون كويس لانه بيحفز الانسان انه يوصل لهدفه باصرار وعزيمة
    مهما كان السبب من اثبات عكس مايقال عليه
    الا انه في النهاية يصل لما يريد
    بتوفيق من الله عزوجل

    تحياتى ليك ياابومالك
    ومنور دايما علماء ومفكرين العيلة الكريمة
    :)

    ReplyDelete
  11. آخر العنقودJune 2, 2008 at 9:47 PM

    فاتيما حبيبتي

    كلامك مش كلام هجايص ولاحاجة
    "ايه هجايص دى":)
    كلامك اكيد موجود منه كتير
    فكرة التحايل والمعايشة دى بتبقى كتير من ضمن الحلول اللى بيلجألها الانسان عشان يقدر يقنع نفسه انه وصل للى هوه عايزه

    بس اكيييييد مش بيعدى عليه كده
    طبيعى جدا انه يتغير مهما حصله
    بس ممكن مش يلاحظ تغيره ده الا لما يمر بموقف مشابه للموقف اللى غيره

    تهوتي طبعا مني ...وانا كمان
    ههههههههه

    كلامك جميل بجد
    بس انتى لو فعلا دققتتى فى نفسك هتلاقيها اكيد اتغيرت
    دى طبيعة البشر ياطمطم

    ReplyDelete
  12. آخر العنقودJune 2, 2008 at 9:49 PM

    جمعاوي روش طحن

    اولا حمدلله ع السلامة بعد طول غيبة وامتحانات ويارب موفقين باذن الله

    ثانيا بقى
    حضرتك قولت ان الاتنين بيتغيروا

    وده فعلا صحيح
    المهم نكون بنتغير للافضل ونختار كويس اللى نتغير بيه وله

    تحياتى ليك
    دمت بكل الخير

    ReplyDelete
  13. آخر العنقودJune 2, 2008 at 9:52 PM

    فهد

    موافقة كلامك جدا يافهد
    بس طبعا النماذج اللى انت ذكرتها دى كلها نماذج جميلة
    عشان كده اوافقك لما بتقول اتغير ومش يهمني الناس
    يعنى ده اكيد راجع لنوع التغيير اللى احنا عاوزينه
    يعنى نبدأ بنفسنا ومش نستنى حاجة تحصل عشان تغيرنا

    تحياتى ليك
    ومنورانى دايما بتعليقك

    ReplyDelete
  14. آخر العنقودJune 2, 2008 at 9:57 PM

    الحمد لله على قدره

    اولا جزاكم الله خيرا على اطرائك الجميل لي ولكتاباتى

    كلامك ده موجود كتير بينا اخى
    اللى بيكون نفسه انه يوصل لشئ ويمنعه احد ويعوقه
    فى حين ارادة الغير له شئ آخر

    استعن بالله وحاول أن تصل لما يرضي الله ويرضيك وأن ترضي من حولك مادام لايغضب الله
    ولاتحمل نفسك مالاتطيقه
    والحمد لله ان اعانك فيما ذكرت بفضل منه
    وفقك الله لما يحب ويرضى

    دمت بخير
    واتمنى دوام التواصل

    ReplyDelete
  15. آخر العنقودJune 2, 2008 at 9:59 PM

    بنت أبيها

    كلامك جميل ومظبوط طبعا
    يعني كل واحد وله حياته وله ظروفه
    هوه بيتغير وهيا كمان بتتغير
    ودايما هوه اللى بيسعى انه يتعايش معاها

    يبقى كده التغيير ده شئ راجع للانسان
    صح

    تحياتى ليكى
    ودمتى بخير وود

    ReplyDelete
  16. آخر العنقودJune 2, 2008 at 10:02 PM

    عمرو النوبي

    منورنى بزيارتك الاولى
    ومبروك على مدونتك الجديدة وموفق فيها باذن الله

    كلامك
    طبعا احنا بنتفق فيه على ان التغيير ده سمة اساسية وطبيعية فى الانسان
    لان اللى وحش عاوز يتغير للافضل
    والكويس بردوا عاوز يتغيير للاحسن

    ويبقى التغيير راجع لشخصية الفرد كما ذكرت
    فمن يرضيه هذا لايرضي غيره
    وهكذااااااااا

    دمت بكل الخير
    واتمنى دوام التواصل

    ReplyDelete
  17. الفارس الملثمJune 3, 2008 at 3:54 AM

    يا عيني انتي يا اماني تغيبي كده وترجعي موضوع مكلكع كده
    طيب انا اقول ايه بقي ممممممممم

    استني اتقمص دور المثقف واقلك وجهة نظري..

    في حاجات فينا اكيد بتتغير مع الوقت ومع احتكاكنا بالاخرين

    يعني مثلا واحد لو كلمتيه عن الحب يقولك ده شغل تلامذه ده كلام في الهجايص ,لكن فجاه تلاقي تحول عجيب في شخصيته لما يبتدي يحب بجد

    مثال تاني..

    شخصيه طيبه جدا بتحبش تزعل حد , ناس بتستغل طيبتها اسوأ استغلال ,في لحظه بيحصل تحول جذري في الشخصيه بيجعلها تتبع اسلوب رد الصاع الصاعين ,بل في حالات معينه بتاخد طابع القسوه بصوره مختلفه كليا عن شخصيتها الاول

    يعني الشخصيات وارد جدا التغيير في سلوكها وتصرفها بمرور الوقت..

    في حاجات كده تحس انها صعب تتغير فينا الا بحدوث مغير خارجي قوي وساحق في حياتنا بيجعل نظرتنا للاشياء تختلف وقد نتخذ نتيجة ذلك ارادة التغيير بانفسنا..

    انا بقصدش اننا بنتغير عشان حد لكن لان في حوادث واشخاص وجودهم في حياتنا بيغير ادراكنا للاشياء وبيجعلنا نقرر التغيير

    ايه الدش الكتير اللي انا قلته ده , اني نفسي مش فاهم انا قلت ايه مممممم

    عذرا علي الاطاله ولو مفهمتيش الكلام اللي قلته ده قليلي وانا اعملك جزء تاني من الرد

    تحياتي
    محمد

    ReplyDelete
  18. nigroJune 4, 2008 at 4:31 PM

    إزيك يا أماني
    أخبارك إيه؟
    ليكي شوقة و الله
    بس على فكرة
    زعلان منك
    لا لا زعلان بجد
    بصي ما تحاوليش .. أنا زعلان
    و ألا أقولك .. هو فيه حد يزعل من آخر العنقود برده
    بتقولي إيه؟ .. زعلان من إيه؟
    يا خبر .. و كمان مش عارفة أنا زعلان من إيه؟
    أنا كده بقى زعلت بجد
    و مأموص كمان
    إيه مأموص؟ .. أول مرة أكتب الكلمة دي
    شفت الزعل وحش إزاي
    أديني اتجننت

    بجد يا أماني واحشني كلامك قوي

    يالنسبة لموضوع التغيير
    التغيير ده مش قرار فجائي ملوش اساس أو مبررات
    يعني ما ينفعش الواحد يصحى من النوم الصبح يقول أنا النهارده هأتغير
    فيه دوافع
    والدوافع دي مش نفسه و بس ولا البيئة المحيطة و بس
    الاتنين بيعملوا مع بعض نسيج مترابط جدا و صعب إن ماكنش مستحيل فصله
    حتى و إن كان أحد طرفي النسيج دوره مش باين قوي
    و اللي في الحالة دي ممكن يبان إن التغيير نتيجة رغبة من الشخص نفسه بصورة منعزلة عن البيئة اللي حواليه
    أو نتيجة البيئة المحيطة بدون رغبة من أعماق الشخص نفسه
    بس لو دققنا شوية هنلاقي إتهم برده مرتبطين ببعض
    و التغيير في حد ذاته قرار و القرار أساسه اختيار و الإختيار قائم على الحرية
    فطالما الواحد قرر التغيير
    فلازم يكون فيه تناغم تام و بكرر تاني تاااام بين رغبة نفسه و ظروف البيئة المحيطة
    و إلا يبقى ملوش لازمة التغيير
    و علشان نوصل للطريق الصح من غير اي ذرة ندم

    و برده رغم الكلام الكتير و الدش اللي أنا رصيته ده
    أنا برده زعلان

    يلا سلام

    ReplyDelete
  19. الـسـيـدة نـونJune 4, 2008 at 7:11 PM

    اعتقد والله اعلم ان احنا بنتغير حسب الحاجات الى اتعلمناها واكتسبناها
    يعنى ممكن جدا التعليم ينقل من طبقة اجتماعية متدنية الى طبقة اجتماعية عالية
    وممكن كمان الفلوس تغير الناس

    واى حاجة بنمر بيها اكيد بتغير فينا حاجة
    يا اما بتمحى حاجة وتضيف حاجة جديدة
    وممكن اللى يتمحى ده يكون حلو او وحش
    والحاجة الجديدة ممكن تكون حجاجة وحشة اكتسبناها او حاجة حلوة

    الموضوع مش موضوع اقنعة على اد ما هى طبيعة البشر
    يعنى ابسط مثال
    انتى مثلا يا امانى اكيد بتاخدى راحتك وسط اسرتك اكتر
    فى كل حاجة
    فى طريقة لبس او كلام او اكل او قعاد
    واكيد لو حد ضيف جه عندكم كل حياتك هتتغير
    طريقة لبسك
    طريقة كلامكم
    طريقة اكلك
    طريقة قعدتك
    هل ده معناه انك بوشين مثلا او منافقة؟
    معتقدش
    بس هو احنا كدة
    حسب الى قدمنا احنا بتغير نفسنا عليه
    واكيد اصحابك غير زميلاتك
    غير قرايبك
    غير اهلك

    امممممممممممم
    معنديش قافلة على التعليق ده
    علشان كدة هارمى السلام وامشى

    سلام
    اختك خيخة

    ReplyDelete
  20. رئـــــيسـة حزب الأحلامJune 4, 2008 at 10:55 PM

    انا اتعاملت مع ناس لهم بدل القناع عشرة
    وبجد هما اد اية ناس مش محبوبين وتبص فى عينهم تعرفى انهم بيكدبوا
    وساعات كتير بيبقى عاوز يغير نفسه انا عن نفسى نفسى اجيب قطع غيار جديدة
    تحياتى لكى

    ReplyDelete
  21. eman alaa eldinJune 4, 2008 at 11:56 PM

    الموضوع رائع فعلا
    بس اظن ان كل اللى رد قبلى قالك على المفيد
    المدونة رائعة ودى اول مرة ليا اشوفها وان شاء الله مش الاخيرة

    ReplyDelete
  22. موناليزاJune 5, 2008 at 12:21 AM

    الحياة بتغير فينا حاجات كتير

    ReplyDelete
  23. ادم المصرىJune 5, 2008 at 12:27 AM

    على فكره جميع امدونين قالو الى كنت هقولو واكترر يبختك ليكى اظدقاااء تتحسدى عليهم بجد تقبلى مرورى

    ReplyDelete
  24. UnknownJune 5, 2008 at 12:01 PM

    عائد بعد غياب
    بجد موضوع جميل وشائك بس رأيى إن الحياة زى ما هى بس اجنا اللى بنغير فى نفسنا أو فى الناس والمجتمع اللى احنا عايشين فيه
    تحياتى

    ReplyDelete
  25. عايز أتعلمJune 5, 2008 at 1:54 PM

    السلام عليكم
    رغم اني مكنتش عاوز اعلق عشان الانشغالات بس ..مش مشكلة

    انا بجد شايف ان التغيير مهم جدا في حياتنا ..من نواحي كتير..عشان مش تشغر بالملل والكسل والركود ...وده بالطبيعي بيحصل لما نكون على روتين معين في حياتنا مبيتغرش ..مش كده برضو؟؟؟؟؟؟؟

    يعني انا شايف مثلا ان الاحتكاك بالناس واكتساب خبرات ..وبرضو الجلوس على النت والتقليب في صفحات النت المفيدة في اي مجال ..ممكن يشغل الانسان ..بالنفع طبعا ويكون خير عليه بدل مايشعر بالمملل وكده

    وزي ماقرينا ..دي طبيعة الانسان اصلا من صغره ..الحركة الكتيرة والبحث

    مثلا ..الطفل الصغير ..لو سبناه شويه ..تلاقيه عمال يدور ويجري وميريحش _ طبعا انتي خبيرتنا في الموضوع ده _ فلذلك انا شايف ان الانسان المفروض طول عمره يدور ويبحث والا ايه ..

    زلو الانسان خالف ده في وقت معين.._اللي هي اصلا طبيعته من صغره_ اكيد هيشعر بملل وكسل ويكره الحياه لانه مابيغرش ولا هو بيتغير والا ايه ؟؟؟

    ده حتى الترفيه والخروج عند الشعور بالملل ممكن نعتبره شي كويس للتغيير

    وبس خلاص

    معلش على التطويل .. انا قلت اعلق واضيف لو ممكن ...سلامات

    ReplyDelete
  26. آفاق الحريةJune 6, 2008 at 5:41 PM

    كلنا بنتغير
    زي ماحضرتك تفضلتي نبقي اكتر من واحد مي اتنين بس
    بنتغير حسب الاشخاص اللي حوالينا وطبيعة الحياة

    ReplyDelete
  27. همس الاحبابJune 6, 2008 at 7:25 PM

    البوست كعادة رائع وفكرته جميلة
    يا اختى الطبع بيغلب التطبع
    يعنى الانسان الكويس ايفضل كويس
    والانسان السىء مهما لبس من اقنعة ايظهر برده
    اما التغيير كلنا نبغى التغير للاحسن وحتى لو كدبنا على اللى قدامنا مش انقدر نكدب على انفسنا
    والتغيير احيانا بيبقى وليد البيئة المحيطة بنا وتربيتنا وسلوك من حولنا
    يؤثر فينا بالسلب او الايجاب
    والحمد لله على كل حال
    تحياتى وتقديرى

    ReplyDelete
  28. مجداويةJune 6, 2008 at 9:41 PM

    السلام عليكم
    أراك على خير أختى الكريمة

    وعميق شكرى وامتنانى واحترامى لتواصلك معى ودعائى الدائم لك بكل الخير والسعادة

    والسلام عليكم ورحمة الله

    ReplyDelete
  29. AnonymousJune 6, 2008 at 11:40 PM

    مساء الخير عليكي اول زيارة ليا لمدونتك وبأذن الله ماتكون الاخيرة

    والله انا شايفة ان البني ادم مابيعرفش يتغير الا لماتيجي حاجة تهزه بعنف وتغيرو لكن ينام بالليل يصحى الصبح متغير لأ ده صعب جدا او شبه مستحيل

    تحياتي ليكي

    ReplyDelete
  30. ادم المصرىJune 8, 2008 at 3:53 AM

    اذيك اخبارك انا نزلت جزأ تانى من اميره بكل النساء ياريت اتشرف بيكى وتعلقى على بوستى دعوتى عامله

    ReplyDelete
  31. nigroJune 8, 2008 at 8:26 PM

    إيه يا أماني
    انت فين
    هو انت بقيتي بتتأخري كده ليه؟
    يا رب يكون المانع خير

    ادخلي اثبتي وجود بأي حاجة
    طمنينا عليكي

    يلا سلام

    ReplyDelete
  32. Abo 7anfJune 8, 2008 at 10:14 PM

    السلام عليكم
    الموضوع جميل جدا
    ولو كانت المشكله اننا بنلبس قناع قدام يبقى الحل شبه سهل
    ساعات بنخدع بنفسنا
    بنلبس قناع قدام نفسنا
    عارفه الهايز يتغير ونفسه بتقاومه
    بيبقى عارف انوا غلطان وان دا مش صح
    وعايش فى تانيب ضمير وعذاب
    مبين العايز يغيره
    والمش عارف يعمله
    بتبقى اصعب كتير

    ReplyDelete
  33. الـسـيـدة نـونJune 9, 2008 at 10:11 PM

    انا قلت اعدى اشوف ايه جديدك
    لاقيتك متاخرة
    قلت ادحرج السلام
    وانتى القفيه بقى

    سلامى لكل الاسرة الكريمة نفر نفر

    اختك خيخة

    ReplyDelete
  34. فارس بلا جوادJune 10, 2008 at 4:15 AM

    أول زيارة لمدونتك .. وان شاء الله مش الاخيرة .. البوست اللي كاتباه جميل وتقريبا انتي حللتي الموضوع من جميع الجوانب .. بس انا كنت عايز أقول أن عدم قدرة الإنسان علي التغيير بتسبقها حاجه أهم وهي عدم قدرته علي إكتشاف عيوبه .. أحيانا بيكون الانسان رافض يتغير لأنه رافض يعترف بالعيوب اللي الناس شايفها فيه أو بيكابر ..
    أتمني انك تنوريني و أسمع رأيك

    ReplyDelete
  35. AnonymousJune 10, 2008 at 5:24 PM

    اكيد كلنا بنسعى للتغير ... للاحسن طبعا
    لكن كل واحد بيشوف الاحسن من وجهة نظره هوه و اللى يريحه هوه مش من وجهة نظر الناس مع ان الناس لهم تأثير فى التغيير
    لكن انا شايفة انى ممكن اتغير لما يكون التغيير ده لصالحى و اكون مقتنعة بيه ...
    يعنى مش اتغير لمجرد التغيير علشان الناس و بس . لا علشان نفسى اكون احسن.
    و على العموم ناس كتير اوى مابتشوفش عيوبها حتى لو انتقدها ناس كتير لكن مش عايزة تتغير علشان هما عاجبين نفسهم كدة .

    و شايفة ان الحياة بتتغير هى كمان للاحسن بقى ! للاوحش !!! المهم اننا مالناش يد فى تغييرها و ربنا يجعلنا راضيين دايما بيها


    المهم اننا ندعى ربنا دايما انه يساعدنا اننا نتغير لما يحب و يرضى .



    جزاكى الله كل خير .

    ReplyDelete
  36. عاشــــــ النقاب ـقــــة"نونو"June 11, 2008 at 9:41 AM

    السلام عليكم
    انا وحشة اوي متاخرة اوي
    اعتذر
    التغيير بيبقى مطلوب بيبقى جميل اوي لو من حاجة سيئة لحاجة كويسة ويا ريت تكون نابعة من الانسان نفسه لانه لو نابعة منه هيبذل اكتر علشان يتغير اسرع بعكس انه عاوز يتغير لان اللي حواليه عاوزينه يتغير وهو مش مقتنع وارضاءا للي حواليه بيحاول
    المفترض ان في اي حالة نصبر لان التغيير مش في يوم وليلة
    لازم له وقت وعزيمة
    تحياتي وتقديري

    ReplyDelete
  37. zOzOJune 11, 2008 at 4:19 PM

    ازيك ؟ عامله ايه ؟
    وحشاني والله
    وشكرا علي سؤالك


    اما البوست بقي
    مش عارفه اقولك ايه
    بس احيانا احنا اللي بنتغير واحيانا الحياه
    بس احنا بنغير الحياه اعتقد اكتر
    يعني انا لسه خارجه من الامتحان
    وقولت اجي اطمنك الاقي امتحان هنا تاني
    لا حرام والله


    تحياتي ليكي علي البوست
    في رعايه الله

    ReplyDelete
  38. الفارس الملثمJune 11, 2008 at 7:04 PM

    انا ملاحظ غيابك عن المدونه هنا . انشاء الله يكون السبب خير؟؟؟؟؟

    تحياتي
    محمد

    ReplyDelete
  39. آخر العنقودJune 11, 2008 at 9:10 PM

    الفارس الملثم..محمد

    كلامك مظبوط جدايامحمد
    فعلا دى امثلة موجودة كتير بينا
    وفى منا فعلا ممكن مايتغيرش الا بحاجة جامدة قوى فى حياته
    يعنى زى مابنقول دايما اننا اكيد بنتعلم من تجاربنا
    تحياتى ليك
    وبتنورنى جدا بوجودك

    ReplyDelete
  40. آخر العنقودJune 11, 2008 at 10:49 PM

    نيجرو

    حمدلله ع لاسلامة وموفق يارب فى الامتحانات
    وعارفة انى مقصرة في السؤال
    بس معذرة يامحمد

    كلامك وتعلقك على الموضوع جميل
    انك بتقول انه نسج وربط بين الانسان وظروف البيئة
    هوه فعلا كده
    اهم حاجة نلاحظ ونتغير للافضل

    تحياتى ليك يانيجرو

    ReplyDelete
  41. آخر العنقودJune 11, 2008 at 11:03 PM

    خيخة

    كلامك حلو طبعا
    بس التغيير اللى انتى قولتيه ده
    تغير ظاهرى او ممكن نقول انه حاجة طبيعية لابد منها
    انا قصدى التغيير فى المبادئ والاخلاقيات
    اللى بيتغيروا عشان ناس وبتثبت عشان ناس تانية

    زى موضوع الفلوس كده
    فعلا بتغير فى النفوس كتير

    تحياتى ليكى ومش عندى قافلة للرد
    :)))

    ReplyDelete
  42. آخر العنقودJune 11, 2008 at 11:08 PM

    رئيسة حزب الاحلام

    اكيد كل نوع موجود فى حياتنا
    وحوالينا
    بس ربنا يسهل وناقي قطع غيار اصلية
    :)

    تحياتى ليكى ومنورانى دايما بردودك

    ReplyDelete
  43. آخر العنقودJune 11, 2008 at 11:09 PM

    بنت الحرية

    منورانى بزيارتك الاولى ليا
    ويارب مش الاخيرة وسعيدة جدا برايك فى المدونة

    دمت بكل الخير
    واتمنى دوام التواصل

    ReplyDelete
  44. آخر العنقودJune 11, 2008 at 11:11 PM

    موناليزا

    صحيح ...هيا كده دوامة واحنا فيها دايرين

    تحياتى ليك
    ***********
    آدم المصرى

    ربنا يكرمك يارب
    وماتقلقش كل المدونين اخوات

    تحياتى ليك

    ReplyDelete
  45. آخر العنقودJune 11, 2008 at 11:13 PM

    ايمن بدر

    اهلا بيك بزيارتك الاولى للمدونة

    رايك سليم طبعا
    بس مادام احنا بنتغير والمجتمع حوالينا بيتغير يبقى اكيد الحياة هتغغير
    لاننا جزء من المجتمع والمجتمع هوه الحياة لكل شخص

    يعنى ممكن تقول انها دايرة وكله داير فيها

    تحياتى ليك
    واتمنى دوام التواصل

    ReplyDelete
  46. آخر العنقودJune 11, 2008 at 11:15 PM

    خليفة

    جميل جدا طبعا ان الانسان دايما يسعى للتغيير من نفسه وتطويرها
    المهم يكون دايما للافضل

    بس فى نوع تانى من التغيير
    وهو النفاق او التغيير لظروف معينة
    ربنا يعافينا منه

    دمت بكل الخير

    ReplyDelete
  47. آخر العنقودJune 11, 2008 at 11:16 PM

    آفاق الحرية

    فعلا كلنا بنتغير
    بس اهم شئ يكون للافضل
    ولرضا ربنا سبحانه وتعالى

    دمت بخير
    حمدلله ع السلامة

    ReplyDelete
  48. آخر العنقودJune 11, 2008 at 11:18 PM

    همس الاحباب

    ايووووووووووه دى نقطة من اللى انا اقصدها
    ان فعلا كتير بنلاقى ان الطبع بيغلب التطبع
    يعنى فى ناس كتير بتحاول تغيير نفسها ومش بتقدر

    بس الاهم اننا نحاول نتغيير للافضل

    تحياتى ليك ومنورنى دايما

    ReplyDelete
  49. آخر العنقودJune 11, 2008 at 11:19 PM

    مجداوية

    شكر الله لك سؤالك اختى الكريمة
    اسال الله ان يحفظ علينا نعمته وحبه

    كل التقدير والاحترام لكى اختى الحبيبة

    ReplyDelete
  50. آخر العنقودJune 11, 2008 at 11:21 PM

    نورة الخشن

    منورانى بجد بزيارتك
    وطبعا يعنى يانورا اكيد لازم يكون للتغيير سبب ودافع طبعا لو الموضوع نوم وصحيان كان يبقى مفيش اسهل من كده
    :)

    تحياتى ليكى

    ReplyDelete
  51. آخر العنقودJune 11, 2008 at 11:22 PM

    آدم المصرى

    باذن الله سيتم الزيارة اخى الكريم

    *************

    نيجرو

    ربنا يكرمك يامحمد على سؤالك
    والحمد لله انا بخير

    دعوووووووووووواتك
    ومعذرة على التقصير

    ReplyDelete
  52. آخر العنقودJune 11, 2008 at 11:24 PM

    ابو حنف

    الله عليك وعلى تعليقك

    فعلا دى بتكون مشكلة كبيرة
    انك تكون عارف انك غلط وانك تكون نفسك تتغير ومش عارف تتغير

    ربنا يرحمنا ويهدينا واياك للخير

    تحياتى

    ReplyDelete
  53. آخر العنقودJune 11, 2008 at 11:25 PM

    خوخة

    ربنا يكرمك ياخوخة وسلامك وصل ياقمر
    ربنا مش يحرمك منى
    :)))

    ReplyDelete
  54. آخر العنقودJune 11, 2008 at 11:37 PM

    يوسف ابوزيد

    منور ياجميل
    طبعا الانسان دايما يحب انه يتغير للافضل
    وانه يسعى لكده دايما
    وزى ماقلتى اهم شئ انه يكون فى رضا ربنا سبحانه وتعالى

    منورانى ويارب دايما

    ReplyDelete
  55. آخر العنقودJune 11, 2008 at 11:42 PM

    فارس بلاجواد

    اهلا بيك بزيارتك الاولى ويارب مش الاخيرة
    فعلا كتير بيكون عاز يتغير
    بس مش بيبقى عارف ايه اللى المفروض يتغير
    ومش بيكون عارف نقط العيوب فين

    دمت بكل الخير

    ReplyDelete
  56. آخر العنقودJune 11, 2008 at 11:45 PM

    nonoymm

    يااااااااااااا بجد بتنورينى
    وانا فعلا اللى مقصرة مش انتى

    تعليقك جميل
    وفعلا التغيير ده بيحتاج لوقت وعزيمة كبيرة قوى

    ربنا يرشدنا دايما للخير

    دمت بسعادة وود

    ReplyDelete
  57. آخر العنقودJune 11, 2008 at 11:47 PM

    زوزو

    مش ممكن
    مدلله ع السلامة ياقمر
    وموفقة باذن الله فى الامتحانات
    وياستى ولا يهمك
    المهم انتى تكونى كويسة وبخير

    تحياتى ليكى

    *****************

    الفارس الملثم

    والله مش عارفة اقولك ايه يامحمد
    جزاكم الله خيرا على السؤال والحمد لله انا بخير
    ودعواتكم ليا قوى

    ربنا يكرمك يارب

    ReplyDelete
  58. ادم المصرىJune 13, 2008 at 1:34 AM

    تحياتى ليكى وللبوست الخطير ده جميل جدا بجد كلامى عالى جدا ونقى اكيد لو طالع من قلبك يبقه انتى انسانه عظيمه انا بعز جدا الانسان الى يتحدا اى حد المهم يحقق زاتو تقبلى مرورى واتمنا اشوفك فى مدونتى

    ReplyDelete

رأيـــك يهـمنــى؟؟؟