كوكتيل تاجـــات

بصراحة كنت ناوية اكتب فى كام موضوع ورا بعض بس اعمل ايه لا مفر من التدبيسة اللى اتحطيت فيها

ما انا مش اقدر اتأخر على أخواتى حبايبي ... فما باليد حيلة
ابدأ بقى بالتاج المسوس ... بتاع دكتورتنا النجمة الصامدة

:D

(1)

هل تحب طبيب الأسنان ؟؟ ولماذا؟؟

احم احم ... بصراحة انتى ممكن تقولى انى مش بحب الدكاترة عموما

فما بالك بدكاترة الاسنان :) وده مش له علاقة بيكى طبعا يادكتورة

بس والله مش كره ليهم هما .. لكن مش بحب العلاج والتقيدات بتاعتهم دى

ربنا يعافي الجميع يارب

(2)

متى كانت آخر مرة زرت فيها طبيب الأسنان؟؟

أخر مرة حصلى الشرف الموجع ده كان من 3 سنين تقريبا والحمد لله

(3)

هل لديك طبيب أسنان ثابت أم تذهب إلى أى طبيب حسب الحاجة؟؟

لا بصراحة مفيش دكتور ثابت .. يعنى بتكون حسب الظروف والمكان اللى انا فيه

يعنى لو اللى متابعة معاه مش موجود أموت من الوجع مثلا :)

(4)

هل أنت مؤمن بأن المتابعة والكشف الدوري عند طبيب الأسنان أمر ضروري؟؟ ولماذا؟؟

مؤمنة والحمد لله .. لكن أظن إن طول ما الواحد مرتاح مش بيفكر فى كده ناقصين وجع سنان كمان

و طول مافي محافظة شخصية أعتقد انها مش ضرورية

(5)

عندما تذهب لطبيب الأسنان لتلقي العلاج هل يفيدك الطبيب بمعلومات تكفيك عما تعاني منه؟

وهل ترغب في الحصول على هذه المعلومات اصلا ام أن الامر لايهم مادام سيعالجك؟

بصراحة مش دايما .. يعنى في دكاترة متحاورة باسلوب جيد جدا ومريحة فى اسلوبها وردها عليكى

وفي دكاترة تانية تحسي انها عايزة تضربك وانتى بتسأليها .. زى ما أكون أذنبت انى ضرسي وجعنى

:D

(6)

يعتقد الكثيرون بأن طبيبة الأسنان أقل مهارة من طبيب الأسنان .فماهو رأيك؟ وماالسبب؟

أنا عن نفسي مش جربت دكتورة خالص .. مش عدم ثقة بس لانى مش لقيتهم أصلا

يلا بقى شدي حيلك ... ومفيش فرق طالما إنها متميزة ومتفوقة في مجالها

(7)

إذا كنت والدا أو كنت أما هلى تهتمـ/ين بإعطاء طفلك ثقافة جيدة عن الاعتناء باسنانه؟؟

شئ أكيد طبعا ... بس لما ابقى ان شاء الله :)

دى من أهم السلوكيات اللى احب انهم يتعلموها بإذن الله

(8)

كم مرة تقومين بغسل أسنانك؟؟

يوميا بفضل الله ... وممكن تكون كذا مرة كمان

(9)

ماهي علاقتك بالسواك؟؟

علاقة طيبة .. لكنها مش منتظمة

(10)

حسب معلوماتك .. ماهي المواد الطبيعية والغذية التي يمكن ان تكون مفيدة للأسنان؟

حسب معلومات سيادتى .. افتكر انه اللبن ومنتجاته والبيض

صح بردوا ولا ايه؟؟

:D

(11)

هل تعتقد أن أطباء الأسنان "نصابون"؟؟

امممممممممممممممم

بصراحة انا مش جربت حد ونصب عليا .. هوه يمكن معروف ان علاج الأسنان أصلا مكلف قوى

وده تقريبا لان ادواته أصلا مكلفة وغالية

(12)

ماهى أكتر صفة تود أن تكون لدى طبيب الأسنان ؟؟

الاحسااااااااااااااس باللى تحت ايده:)

بجد يحاول على الاقل يشعره انه حاسس بآلامه ولو بالايحاء ياشيخة:)

(13)

عندما يقوم الطبيب بإجراء علاج معين ثم يطلب منك الذهاب الى البيت والعودة بعد مدة هل تعود ؟؟ ولماذا؟

أيوه للأسف برجع تانى... عشان مش ارجع للللآلام فبضطر استحمل وارجع له :)

(14)

أيهما أفضل بالنسبة لك الخلع أم العلاج وإن كان مؤلما؟؟

أكيد طبعا العلاج

(15)

أجريت دراسة أثبتت أن نسبة كبيرة من شعور مرضى الأسنان بالآلم هو إيحاء نفسي إلى أى مدى تتفق مع هذه الدراسة؟؟

لا بصراحة ما اعتقدتش ابدا.. الا الاسنان بقى ده مش ينفع فيها ايحاءات خااااالص

يعنى من حلاوة وجعها مثلا

:)

(16)

اكتبي النقاط والتساؤلات والامور الغامضة بالنسبة لك حول طب الاسنان وطبيب الاسنان؟؟

هل فعلا أفضل وأسلم حل دلوقتى هي اماتة العصب؟؟

وهل عملية الحشو دى ليها مدة معينة ؟؟ وبيحتاج لتجديد؟؟

وبس خلاص

ربنا يعافينا يادكتورة ويجعل كلامنا خفيف عليكوا

لما نشوف أخرة الاستبيان ده ايه؟؟

:D

**************

التاج التانى من سمسم صاحبة مدونة بحبك يامصر

(1)

من أنت؟؟

إنسانة بسيطة وطموحة بحب أعيش حياتى بكل مافيها في طاعة ربي أجمل حاجة عندى إنى أدخل السرور لقلب إنسان وما احبش حد يتكلم عن حد في ضهره

(2)

بطاقتي الشخصية؟؟

الاسم: أماني

المهنة: حاصلة على بكالوريوس في التربية والعلوم

من مواليد شهر سبتمبر

محل الاقامة:المنوفية

الديانة: مسلمة

الحالة الاجتماعية:سينجل

(3)

ماهي أحلامك؟؟

أحلامي كتيييييرة قوى ... أولها انى نفسي أحج وبدعي ربنا انه يكتبهالي قريب يارب

بحلم أكون مسلمة نافعة؛؛ عاملة؛؛ أخدم ديني وبيتي وأقدر إنى اكون نموذج للبنت المسلمة على المستوي الشخصي والعام

بحلم وبدعي ربنا يقدرني على تحقيق باقي أحلامي الشخصية فى كل حياتي .. ومش مهم أقولها بقى

:)

(4)

من هو أقرب شخص ليكي؟؟

هوه انا لو كنت اتسأئلت السؤال ده من فترة كنت ممكن أقول أرد رد تانى

لأني كتومة شويتين فى شخصياتي ..لكن دلوقتي في شخصية قريبة قوي مني وبحب اتكلم معاها في كل حاجة تخصني وأحسها

وده مش يمنع انى في ناس قريبة من قلبي وبحب اتكلم معاهم بعد أمي وأخواتي طبعا

*************

التاج التااااااالت ... يامسهل

(1)

ايه معنى السعادة من وجهة نظرك ؟ حاسة إنك سعيدة؟

أكيد سعادتي في رضا ربنا وعطائه ليا

بس بالنسبة للسعادة بردوا يوم مايكون في مشكلة وأقدر إني اتغلب عليها وأحقق أشياء يقال

أنك لاتستطيع تحقيقها

إنتى سعيدة... لا أنا أمانى :D

الحمد لله .. أكيد مش هقول انى سعيدة على طوووول أو انى حزينة على طول

لكنها الحياة مابين هذا وذاك .. الا أن مايهون علينا يقيننا بقدر ولطف الله بنا

(2)

امتى حسيت إنك ظلمت إنسان ؟ وليه؟ ومحتاج للحظة غفران منه؟

أنا مش هقول إني ملاك وماحدش بيزعل منى.. لكن الظلم دى كلمة كبيرة قوى

لكن ممكن أقول إنى أحس إني ظلمت حد يوم ما أسئ الظن فيه .. ودايما احب إفتراض حسن النية إلى ان يثبت العكس... رغم إن انا اللى بتصدم :( بس ده أهون عليا

بس بتمنى فعلا إنى لو ظلمت حد وانا مش عارفة انه يسامحنى ويعرفني

(3)

بتعمل ايه لما تكون متضايق بعد ما تصلي؟؟

هوه طبعا السؤال غريب شوية.. لأني اللى بعمله وأنا متضايقة أصلا إني بصلي

لكن كمان ممكن أعيط قووووووووووووووى بس وانا لوحدي ؛؛؛ واقرأ قرأن

والجديد من فترة إنى بقيت برتاح قوى لما اكتب اللى جوايا على الورق

ويسلاااااااام بقى لو وصل للى انا عاوزاه يوصله
(4)

امتى حسيت إنك اتظلمت؟؟وليه؟؟

يوم بردوا ما يساء الظن فيا وفى كلامي ويبنى عليه آراء ومعتقدات من غير توضيح

ويوم ما أخلص قوى لحد واحبه قووووى وأحس منه بجرح أو لا مبالاة وعدم إهتمام بمشاعري

وليه بقى ... لأنى بمنتهى البساطة مش بحب اعمل الحاجات دى فى حد واحب اتعامل واتحب زى ما انا بتعامل مع الناس بوضوح وشفافية وصراحة

(5)

ايه أكتر إحساس بيراودك هذه الأيام تجاه نفسك والآخرين؟؟

إحساسي اتجاه نفسي إنى مقصرة ومحتاجة أسعى عشان أحقق كل اللى بتمناه فى حياتي

احساسي تجاه الآخرين بقى .. فبجد احساس بالحزن والهم وان كل واحد جواه اللى يكفيه وزيادة

احساس بالضحكة المصطنعة .. احساس بالدمعة المخنوقة

(6)

امتى ممكن تتنازل عن حق من حقوقك ؟؟ والسبب

أكيد يوم ما اكون هتنازل لحد قريب قوى منى ومن قلبي ويكون يهمنى وإنى أحس وقتها إنه بكده هيكون مبسوط ومرتاح

بجد ساعتها ممكن اتنازل عن سعادتى انا شخصيا لو ده هيبسطه وهيخفف عنه عبئه

لاني ما احبش أبداااااا احس إنى عبء زيادة على حد وخصوصا لو بحبه وعارفة ظروفه وتعبه

حتى لو من جوايا انا بتقطع من قراري

وبس خلاااااص.. كفاية كده

*************

تم بحمــــــــــــــــــــــــــــــد لله

:D

بلا عنوان

كل منا بحياته من هو أقرب إليه منه ... من يشعر به ... من يحتاج إليه

فكل منا يمتلك أنفس هي أحب إليه من نفسه

أنفس يخشى عليها من كل ماحوله حتى من نفسه

يخشى عليها لأنها بمنتهى البساطة هدية له من الله

ما بحث عنها .. لكنه وجدها بقدر الله

أنفس تشاطرك الحياة .. حلوها ومرها

تتغلغل في أعماقك فتسعد بقربها أكثر من أجمل مافي الحياة

أنفس قد تقترب منها لتعرف دواخل نفسها دون أن تعلم

أنفس صامتة غير أنها مليئة بالأفكاروالمشاعر

عاقلة غير أن قلبها به من الحس مالم تجده في غيرها

متماسكة متجالدة تتحامل على نفسها

لكننا

:

قد نخطئ وقد نجرح هذه الأنفس المرهفة وقد لانحسن مراعاتها

وقد نسئ إليها ببساطة دون أن نعلم

فيااااااالقسوتنا

كم نقسو كثيرا على أحب الخلق إلينا؟؟

كم نتمنى أن لن يحدث هذا الجرح في يوم من الايام؟؟

شعور جدا مؤلم أن تشعر بأنك قسوت على أقرب الناس إليك دون أن تدري و دون قصد منك

ودون سابق إنذار ودون أدنى توقع منك

والأصعب من ذلك ...أن يحدث كل هذا وأنت بعيد عنهم ... تتمنى قربهم في هذه اللحظة

تتمنى أن يكونوا معك .. بجانبك ..كي تتحدثا سويا

ويخرج كل منكم ما بداخله

لكن

:

يبقى الأمل في يقين كل منهم بما يحمله الآخر له .. ويقين بسعة قولبهم التى تحملت لكل منهم الكثير

بأن يسع قلب كل منهم الآخر في لحظة شدة وآلم تمر بهم

وما دامت النويا والمشاعر صادقة وخالصه إذا فسيكمل الله وصال جروحها بقدرته

اللهم آمين..آمين

الرفق ...إلا زانه

لا تخلو حياتنا من المواقف التي نحتاج فيها إلى تقديم توجيهات ونصائح للآخرين..نقدمها للولد

للزوجة..للصديق..للجار

وتخنلف نهايات النصائح ...بإختلاف بداياتها

بمعنى

إن كانت البداية بأسلوب مناسب ..ومدخل لطيف ..انتهت كذلك

وإن كانت بأسلوب جاف .. ومدخل عنيف .. انتهت كذلك أيضا

عندما ننصح الناس فنحن في الحقيقة نتعامل مع قلوبهم .. لا أجسادهم

لذلك تجد بعض الأشخاص يتقبلون النصح من شخص دون الآخر

وأول البراعة في النصيحة .. ان لانكثر منها وندقق في كل صغيرة وكبيرة .. حتى لا يشعر الآخرون

أنك مراقب لحركاته وسكناته .. فتثقل عليه

وإن استطعت أن تقدم النصيحة على شكل إقتراح ..فافعل

لأن من المؤكد أن لا أحد يحب أن يشعر بأنك تلقي عليه أوامر لإتباعها

وليكن القصد علاج الأخطاء .. لا .. الانتقام والاهانة

فلتجعل لسانك عذبا .. فما أجمل ان يكون أحدنا مصلحا للأخطاء .. ناصحا ..وفى الوقت نفسه خفيف النفس عليهم غير مضجر ولا ممل لهم .. فإن استطعت أن تلفت النظر للاخطاء دون أن يشعر

فهو أولى

وللأسف .. كثيرا ما نجد من يوجه النصح للآخرين وكأنه قد كفر بفعلته شئ ما.. والأدهى أنه يكون قد سمع عن فعلته ولا يوجد مايثبتها له .. فيبدأ بتوجيه الاتهامات والاهانات له دون التأكد منها

فلا بد من التأكد من الخبر أولا ... ثم نحسن الظن به واعتبر أنه وقع في الخطأ بدون قصد أو دون ان يعلم ولنختصر ولا نجادل

ولا ننسى الرفق في النصح ... يقول " صلى الله عليه وسلم" ما كان الرفق في شئ إلا زانه .. وما نزع من شئ إلا شانه

وإن كان المرء قد يحتاج الشدة أحيانا .. حتى في النصح .. وهذا هو الحكمة في النصيحة .. وهي وضع الأمور في مواضعها

أذكر مثالا يوضح مدى تأثير الكلمة على سامعها والوصول لما تريد بحب ورضا

اتفق صديقان على أن يتقدما لرجل لخطبة ابنتيه .. كانت إحداهما أكبر من الأخرى

قال أحدهما للآخر : أنا آخذ الصغيرة .. وأنت تاخذ الكبيرة

فقال الأول : لااااا بل أنت تاخذ الكبيرة .. وانا آخذ الصغيرة

فقال الأول : طيب .. أنت تاخذ الصغيرة .. وأنا آخذ التي أصغر منها

قال : موافق!!!!!

وهكذا لم يدرك أن صاحبه ما غير قراره ... سوى انه غير اسلوب الكلام برفق

:D

فالرفيق .. الهين اللين .. محبوب عند الناس .. تطمئن له النفوس .. وتثق فيه .. خاصة إذا صاحب ذلك وزن للكلام .. وقدرة على التعامل الرائع مع الآخرين

فلو استعمل الزوجان الرفق مع بعضهما .. وكذلك الأبوان .. والمديرون

لزالت أكثر المشاكل والخصومات

ولا داعي لتوجيه الجرح والاهانة عند النصح وإحراج الآخرين لدرجة إحمرار الوجه

ولكن

يمكن أن تأكل العسل دون أن تحطم الخلية

تاجين فى واحد

سلام الله عليكم ورحمته وبركاته

وصلني تاج من أختي الجميلة "سمسم" صاحبة مدونة "بحبك يا مصر" وهوه سؤال واحد لكن مش سهل أبداااااا

بس ما علينا ... كله عشان خاطرك ياسمسمة

السؤال... اذكر ست أسرار لا يعلمها من يقابلك للمرة الأولى؟؟؟؟

:

بسيطة جدا جدا جدااااا ومش بحب التكلف في أى شئ على عكس ما بيظهر انى متكبرة زى ما بيقولوا

إجتماعية وبحب الناس قوى وطيبة قوى قوى وبزعل لانى ممكن مش يبان كده عليا..مش عارفة ليه

مرحة ومش بحب النكد "لكن أحترم الحزن" وده مش بيتعرف فيا على طول لأنى أعشق الهدووووء

عنيدة وأحب الاصرار والتمسك بأحلامى ومحاولة تحقيقها ولا احب كلمة المستحيل

"لكن طبعا فى إطار إمكانياتي وبعيدا عن الخيال"

مخلصة ووفية جدا ودائما ما أحب إفتراض حسن النية فى كل من أعرفه

وأعشق التسامح وتقدير الغير... ومش بعرف أكره بسهولة أبدااااا

واضحة وصريحة ولا أحب المجاملة ولكن مع حرصي الشديد على عدم إحراج الأخرين

وطبعا بعد كل ده أقول

إنى حساسة قووووووووووووووووووووى

بس مش انى بزعل بسرعة "لا" لكن أحب الاهتمام بالمشاعر والذوقيات فى كل حاجة

:

:

التاج التاني وصلني من "الفارس الملثم" صاحب مدونة "ثرثرة تحت المطر

نبدأ .... بســـــــــــم الله

لو أعطيتك 3 وردات من هم ال3 أشخاص اللى هتهديهم الورد؟؟؟

الأولي ... لأحن قلب أمي الحبيبة

الثانية ... لصديقة قريبة لقلبي

الثالثة بقى ... أحافظ عليها وأرعاها الى أن يشاء الله بمن أعطيها له

لو أعطيتك ورقة بها 3 سطور تكتب اللي أنت عاوزه ...تقول ايه؟؟؟

حياة المؤمن لاتكون الا بالإبتلاء

ولا يكون الابتلاء لذيذا إلا بالصبر

ولايكون الصبر تاما إلا بالرضا

وهنا ... هنا فقط ننجح في رحلة الحياة

ماهو هدفك في الحياة؟؟؟

هدفي هو الوصول لرضا الله بأن أكون نافعة لديني ولأمتي ولبيتي

وأن أزيد على الحياة ولا أكون عبء عليها

إن شاء الله بكرة هيكون أحسن من النهاردة.... هل تصدق هذه العبارة؟؟؟

الحمد لله ...وبحب التفاؤل ومادام قولنا إن شاء الله

فأنا على يقين بأن قدر الله لا يأتى ألا بخير وإن كان في ظاهره إبتلاء

ولكن نسأل الله الرضا والصبر عند الشدائد

ونسعى دائما بأن نجعله أفضل

ماهي أجمل مقولة سمعتها فى حياتك؟؟؟

بصراحة أنا بيعجبني حاجات كتير جدا لكن ممكن أقول منهم

مايحدد نجاحك في الحياة ليس قدراتك الذهنية ... بل طريقة نظرتك للحياة

غزة بتمثل إيه فى حياتك؟؟؟

جرح ... وإهانة ... وإحساس كبير بالمسئولية

أعطي لإنتمائك لوطنك درجة بالمئة؟؟؟

100%

لو تزوجت وأنجبت بنتين وولدين ... اسمهم هيكون ايه؟؟؟

بصراحة مش عارفة بجد ... لأنى دائما ما أفكر بمبدأ المشاركة والتفاهم فى كل الأمور

فأحب جدا أن يكون "له" النصف الآخر في القرار والاختيار

عمرك غشيت في امتحان وأنت صغير؟؟؟

الحمد لله مش حصلت... لاني بحب التركيز والتواصل وبيبقى نفسي اخلص

قول 3 صفات بـ 3 كلمات توصف بيهم شخصيتك؟؟؟

طيبة ... مخلصة ... رومانسية

لو مرتبك كان كبير ويكفي تجيب اغلى هدية تجيب ايه لكل فرد في عيلتك؟؟؟

أكيد هيكون كل واحد حسب إهتماماته وهحاول جدا اختار حاجة تدخل عليه السرور

دايما ومحتاج لها ... وياريت كمان لو حاجة تكون معاه على طول وبيستخدمها كتير

بكلمة واحدة إيه الصفة اللى انت عاوزها في شريك حياتك؟؟؟

صعبة كلمة واحدة دي لكن ممكن نقول ... الإحتواء والتقدير

ايه المجال اللي غير دراستك وشايف نفسك فيه؟؟؟

الديكور والتصميم

طب دلوقتي حالا ايه المكان اللي نفسك تكون فيه؟؟؟

حالا

حالا

أمام الكعبة الشريفة

ياااااااااااااااارب