تاج لابد منـــه

بصراحة التاج ده وصلنى من4 أشخاص وما أقدرش انى اتأخر على حد فيهم

أولهم الحبيبة نوران صاحبة مدونة بت خيخة وأى كلام

والتانى أبومالك صاحب مدونة المضيفة

والتالت بقى الفارس الملثم صاحب مدونة ثرثرة تحت المطر

والرابعة حبيبة قلبى النجمة الصامدة صاحبة مدونة صمود

عشان كده ده تااااج لابد منه طبعا

وبالمناسبة ده أول تاج أجاوبه وبصراحة ربنا يسترها..... لانى حاسة انه صعب عشان المطلوب انى أتكلم عن نفسى

المهم يعنى ماعلينا نبدأ وأمرى لله ....بسم الله

(1)

أنا إنسانة بسيطة جداااااا بحب دينى وأشعر دائما بالسعادة والراحة والسكينة

لكونى مسلمة أحيا بحب الله وحب رسوله وأتمنى أن ألقى الله وهو راض عنى

(2)

أحب الهدوء والنظام جدا...وأعشق الجمال والطبيعة ...وأسعى دائما للوصول الى التوازن بين الروح والمادة بالاستمتاع بكل مافى الحياة من خلال رضا الله عز وجل

(3)

انا زيى زى اسمى أمنياتى كتيرة اوى وبحلم بحاجات كتير وبسعى دايما لتحقيقها

منها اللى اتحقق ومنها اللى لسه وبدعى ربنا انه يعيننى على تحقيقها فى أقرب وقت

(4)

اكيد زى ماعندى بعض الايجابيات.. عندى كتير من السلبيات ..بحاول دايما أعرفها واتخلص منها

وبحب أوى أكون صريحة مع نفسى ودايما بكلمها وبحاسبها

وبدعى ربى دايما انه يعينى عليها

(5)

ناس كتير بتقول انى حساسة اوى...وبصراحة ده ممكن بس الاكيد انى الحمد لله مش بزعل بسرعة أبدا ومش من أى حد ومع ذلك بصفى بسرعة جدا جدا والابتسامة عندى معناها كبير اوى

والكلمة الطيبة مفعولها عندى سحرى رغم بساطتها

(6)

بردوا بيقولولى كتير إنى رومانسية ...وده برده صح لانى بحب المشاعر جدا ولما بحب حد ممكن تقولى عليا بفترى فى الحب ده.هههههه يعنى بجد بحب باخلاص أووووى وبحب إنى أتبادل نفس الاحساس

وبصراحة بتفرق معايا وخصوصا لو أى شخص يهمنى أو قريب منى ومش عارفة دى حاجة صح

ولا غلط بس بشوف ان أساس أى علاقة مهما كانت طبيعتها هى ..الحب والعطاء

ودى قناعتى الشخصية لأنى دايما أحب انى أعيش بالحب والمودة بين كل الناس

وانى أوصل دينى والتزامى بمعاملاتى وسلوكى ...قبل شكلى ومظهرى

(7)

أوقات كتير بحب العزلة و بفكر كتير أوى أوى..وماحدش يسألنى بتفكرى فى ايه؟؟.. فى اى حاجة ....

المهم انى مش ببطل تفكير فى أى حاجة حواليا وفى أى حاجة بشوفها وخصوصا لو مسافرة لأنى بحب السفر جدا وتكمل حلاوتها لو مع ناس بحبهم ويحبونى ...بس ده السفر اللى بيكون تغير جو بس مش غربة وبعد عن أهلى وناسى.. ده بقى مابحبوش خاااااااالص

(8)

زيى زى أى بنت بحلم ببيت صغير وأسرة مسلمة وأكون فيها الزوجة المخلصة المحبة والأم المثالية

ويكون أساسها الحب والرحمة وامنحهم الاهتمام والرعاية وأولهم الزوج طبعا :)

لدرجة ان ماحدش فينا يعرف مين بيحب التانى أكتر

:)وأؤمن جدا جدا بالنصيحة القائلة

"كونى له خديجة يكن لك محمدا"

وبدعى من ربنا إنى أقدر أطبق كل اللى اتعلمته فى بيتى

واللى قريته عن حسن معاملة الزوج وبناء بيت مثالى قائم على الحب والاحترام

والتفاهم والتضحية وكل المعانى الجميلة اللى ممكن تتقال

(9)

بحب الأطفال جدا جدا وبعشق ضحكتهم ...وبكون سعيدة جدا وانا بحضنهم أو بلاعبهم

وياسلاااااااااااااام بقى لو طفل نام وهوه معايا بجد احساس رائع ومايتوصفش

(10)

من أكثر ما أحب قضاء حوائج الآخرين وأن أيسر لأحد أمرا له فهذه هى متعتى الحقيقة

وكونى احب التعامل بحب مع الأخرين..كذلك لاأحب أن أحمل لأحدا شيئا داخلى

فكما أحب ان أعبر عنى حبى لمن احب ...أحب أيضا أن أعبر لهم عن أى شئ بدر منى من إساءة لهم

أو لى حتى تكون المعاملات صافية وخالية من الشوائب ومحاولة مني بأن نعلو بنفوسنا

إلى صفاء والنقاء

وأخيرا أتمنى من الله عز وجل أن يرزقنى وإياكم الإخلاص فى القول والفعل والعمل

وأن ن يغفر لى ما لا تعلمون...وأن يجعلنى خيرا مما تظنون

آميـــــــن

ابعت التاج ده

للؤلؤتى المكنونة

وخليفة صاحب مدونة عايز اتعلم

ونيجرو صاحب مدونة بهذا حدثتنى نفسى

وسمسم صاحبة مدونة بحبك يامصر

ورودى صاحبة مدونة بنوتة مصرية