***مساكم سكر زيادة***
أنا جاية النهاردة وعايزة كلنا نعمل حاجة كده مع بعض ... متفقين ....ايه رأيكم كل واحد فينا كده يبدأ يقول هوه نفسه في ايه؟؟
بجد والله مش هزار.. ماتيجوا نحلم .... أظن ان الحلم مش حرام ولا ايه ؟ولا يمكن هيحرمونا من الحلم كمان اه ماهوه ده اللى ناقص يعملوه؟؟
وعشان كده بقى ......يلا نحلم
تعالوا نغمض عيونا عن الواقع ده كله ..و نحلم ببكرة... ونحلم بحياتنا هتكون ازاي بعد 20 سنة من دلوقتي
"وماحدش يقولي ياستى خليها ماشية كده يوم بيوم"
انا بقووووووووووول نحلــــــــــــــــــم
مجرد حلم ياناااااس ونشوف ايه اللى نفسنا نكون وصلنا له بعد 20 سنة
ايه اللى نفسنا يكون موجود فى حياتنا ومش موجود دلوقتي؟؟
ايه اللى نفسنا انه يتغير حوالينا ومش يكون له أثر بعد كده؟؟
ايه الحاجات اللى ممكن تكون أفضل من دلوقتى..وازاى ؟؟
وايه اللى ممكن يكون أسوأ؟؟
طب وايه اللى ممكن نعمله عشان نكون زى مااحنا عاوزين؟؟
ياترى كمان 20 سنة هنكون ازاى وبلدنا هتكون وصلت لايه؟؟
احنا نفسنا هنكون وصلنا لايه ياترى هنكون زى مااحنا"محلك سر" ولا هنكون احسن
ولا ممكن نكون اسوأ؟؟
ياترى عاوزين نكون ايه.. وازاى.. وليه؟؟
يعني بجد لو كل واحد اقعد وفكر فى كل الحاجات اللى نفسه فيها
أو حتى حاجة واحدة بيحبها ويقول هوه نفسه تكون ازاى بعد 20 سنة
نفسك تكون ايه بعد ال20 سنة دول؟؟
والأهم من كده
ايه اللى انت بتعمله دلوقتى عشان تكون تقدر توصل للى نفسك فيه وبتحلم بيه؟؟
"ااااااه خدوا بالكوا ماهيا مش احلام وخلاص يعني لازم نعمل عشان نوصلها"
وياترى احنا متفائلين ولا الوضع اللى احنا فيه مش مدينا فرصة اننا حتى نحلم ؟؟
بجد ياجماعة البوست ده مش مجرد احلام وخيالات بس احنا فعلا لو فكرنا كده وكل واحد فكر في اللى نفسه فيه ممكن بجد نتغير
لو كتبنا أحلامنا دي قدامنا هيكون أفضل بكتير لان ساعتها هنحس أنها مش خيال
ونقدر نشوفها ونسعى لتحقيقها
انا عايزة بجد كلنا نكتب لأنها مش مجرد احلام هنقولها ..لأ...دى فعلا ممكن تكون
بداية عشان نعرف احنا عاوزين ايه؟؟
وعاوزين نوصل لفين؟؟
على جميع المستويات..شخصي..عائلى ..اجتماعى..ثقافي..عملي..الحياة عامة
مين عارف ..يمكن نقدر نغير حاجة لما نشوف أحلامنا وأمنياتنا قدام عينينا
ويمكن بردوا ساعتها نقدر نحدد نقطة البداية بالظبط
اللى بيها نقدر اننا نبدأ في تحقيق الاحلام دى
انا مش بقول كده عشان كل واحد يكتب كل حاجة عنه وعن احلامه لان طبعا اكيد كل واحد فينا بيحلم بحاجات كتييييييييير قوى ونفسه انه يتغير.. ويغير.. ويكون له هدف في الحياة
بس انا نفسي بجد اننا نحلم ...ونخرج كل اللى جوانا قدامنا
ونبدأ نشوف ايه اللى المفروض نعمله من دلوقتى عشان نقدر نحقق الاحلام دى
يمكن فعلا تتحقق ونقول ....ياااااااااااه ده كان حلم بعيد قوى عننا وكان صعب تحقيقه
مين عارف...مفيش حاجة بعيدة عن ربنا بس نجرب نحلم وتفائل مهما كانت الظروف
"وما ذلك على الله بعزيز"
39 comments:
بصي يا ستي اولا الموضوع جميل جدا وربنا يكرمك اولا انا هجاوب علي اللي انت طلبتيه
هقول كل اللي بحلم بيه
اولا علي المستوي الشخصي..
نفسي ان ربنا يرزقني العفة ودي اهم حاجة عندي لانها سبب السعادة في كل شئ
اما علي المستوي العائلي ...
اتمني ان يرزقني الله ببر الوالدين ويرزقني بالزوجة الصالحة اللي انا اختارتها
اما علي المستوي الاجتماعي ..
اتمني ان ربنا ينصر المسلمين ويجعل بلدنافي عزة وتُحكم بشرع الاسلام
اماعلي المستوي العملي..
اتمني اني افتح شركة في مجالي لاني كسبت خبرات وربنا رزقني بعلاقات تجعلني اسعي للموضوع
اما الحياة عامة
اتمني ان ربنا يكرمني ويستخدمني لنصرة ديني
في النهايو جزاكي الله خير علي الموضوع
يا خسارة ..كنت عاوز اعلق الاول ..بس ياللا ...نقرأ ونعلق
يا خسارة ..كنت عاوز اعلق الاول ..بس ياللا ...نقرأ ونعلق
موضوع حلو اوى يا حبيبتى
اولا انا بقى بحلم على المستوى الشخصى ان ربنا يبارك لى فى زوجى واولادى ويخليهم لى
وكمان ولادى يحفظوا القران ويكونو احسن الناس
وان انا اقرب اكتر من ربنا لان انا حاسة ان انا مقصرة .............وان ربنا يستعملنى دايما" للخير
على المستوى العائلى بقى ان اكون بارة باهلى واكون فعلا ابنة صالحة ليه
طبعا على المستوى العام بحلم ان شريعة الاسلام تسوووووووووود
وربنا ينصر دينه فى كل مكان
أختك
لولا وجود المعنى لضاعت الأحلام ، ولولا وجود الأحلام لضاع الانسان)
احب ابدأ كلامي بكده زي ماقال د- الفقي ...لو سمحتيلي يعني في مدونتك
وجميل قوي اننا نحلم كده بمزاجنا ..ومن اجمل ماقريت في احلام اليقظة دي _لو كان ممكن نطلق عليها الاسم ده _ انها احلاممفيدة للانسان خصوصا في حالة عجزه عن تحقيق واقع معين ..من حوله زي مثلا الطالب اللي بيرسب علطول يتمنى النجاح ويبقى الاول وكذلك الفقير خالص يحلم انه يبقي غني وكده
في الحالة دي تبقى مفيده ....اما لو زادت عن الحد قوي ,,والواحد سبح في الخيال جامد ..تؤدي لاضرار نفسية للانسان ده
وكذلك لو كل حياتنا احلام يقظة ... ممكن تبقى خطر علينا برضو ...
ماشي حبيت بس ابتدي بشوية الكلام دول
اجاوب بقى شوية
بالنسبة للمستوى الشخصي... اتمنى بجد اني اكون انسان بجد بخاف من ربنا في كل حاجة واعمل حساب لكل خطوة بعملها واحاسب نفسي على الخطأ بجد....
بالنسبة للمجال العملي.. اتمنى اكون متفوق في مجال عملي اللي هو في الغالب والاكيد باذن الله هيكون في الادوية ...واتمنى اعلى مع السنين في المجال ده كويس ...وربنا يسهل
بالنسبة للاجتماعي ...اتمنى اكون محبوب من العيلة كلها ..ومحدش يكرهني ابدا .. واحب بجد اخدم اي حد يطلب مني اي حاجة يكون بمقدوري اعملها ... فأحب الناس الى الله أنفعهم
بالنسبة
للعائلي برضو ...اتمني زي عاشور الزوجة الصالحة اللي تعيني على طاعة ربنا وحاجات كده معينة مش هقولها عشان محدش يضحك....هههههه
بالنسبة للامة بقى ...اتمنى وبحلم بجد باليوم اللي ربنا ينصر فيه الاسلام ويعز المسلمين .... الاان نصر الله قويب
والله سيمكنن لنا في الارض باذنه ..وما علينا الا ان نصلح مابيننا وبين الله حتى يصلح الله مابيننا وبين العباد
وجزاكِ الله كل خير ودمتي بخير
اااااااااااااااااه
نحلم
بجد انا نفسى بعد 20 سنه يكون مستقبل حلو لاولادى ولكل الاطفال
لانى بجد خايف على الاطفال
التقدم المذهل فى كل شىء والارتفاع الجنونى فى الاسعار والاستعدادات القصوى للحروب والمحاولات المستميته لاثاره الفتن بين الشعوب
كلها مؤشرات تدعونا الى ان نحلم ان يكون مستقبل اولادنا بخير
دعوة جميلة للاحلام التى هى المفر الوحيد لنا للفرار من الضياع
نفس بجد كل احلامنا تتحقق يارب امين
اسعدكى الله
محمود عاشور
جميلة قوى أمنية العفة
اسأل الله لنا ولك العفة
أعطاك الله ماتتمنى وزيادة
وييسر لك الخير دائما وان يستخدمك لنصرة دينه وعزه
اللهم آمين
دمت بسعادة وهناء
اسماء
ربنا يكرمك ياسمسمة يارب ويحققلك امنياتك
بس الاهم اننا نعملها عشان نوصل لها
اعطاك الله ماتتمنى وزيادة
دمت بخير وود
طيب انا اعمل ايه دلوقتي ,كل ما اجرب احلم الارسال يتقطع ههههههه
عارفه هو مش سهل اقول احلامي لحد لانها بعضها بعيد اوي ولسه بدري اوي اني اقول ان في امل في تحقيقه ..
وبعضها تحقيقه محتاج لمعجزه او يمكن اقول ان ربنا وحده اللي يعلم ان كان مقدر ليه يتحقق ولا لا ..
احنا بالتاكيد لازم نحلم حتي وان كانت بعض الاحلام صعب تتحقق ..
وزي ما قال محمد منير في اغنيته .لو بطلنا نحلم نموت ..
تحياتي
محمد
خليفة
يااااااااااااااحمدلله ع السلامة
منورنا يادكتور
طبعا كلامك صح جدا بالنسبة للاحلام بس ان شاء الله ماتقلقش مش هتوصل للحالة الخطيرة
ههههههههه
احلام جميلة يادكتور ربنا يحققهالك يارب
والاهم انك تبدأ تعملها عشان تحققها
والامنيات العائلية انا اشهد بتوفرها
بس ياترى ليه هنضحك على المواصفات الزوجة
هههههههههههههههه
هيا يعنى حاجة غريبة ولا ايه
رزقكك الله ماتتمنى وفوقه
دمت بخير وود
عبده الرايق
ااااااااااه والله ياعم عبده عندك حق
لو فعلا فكرنا صح هنلاقى ان هما دول الامل لبكرة
وهما اساس الاهتمام والرعاية
ربنا يكرمك يارب ويحفظلك اولادك واولاد المسلمين جميعا يارب
تحياتى
رئيسة حزب الاحلام
طب مش تقوليلنا اى حلم من احلامك
ده انتى رئيسة البوست ده
هههههههههه
ربنا يسعدك يارب
ويمكن الحلم هوه المخرج اللى من خلاله يمكن نحقق هدفنا
تحياتى
الفارس الملثم
انوى تحلم بس بجد وهوه يتظبط
:)
هوه فعلا فى احلام كتير بعيدة
بس انا بقول بعد 20 سنة
:)
مش كفاية دول ولا ايه
والمعجزة اللى فى احلامنا دى هيا احنا وقدراتنا ومدى اصرارنا على تحقيق حلمنا وسعينا عشان نحققه
اسأل الله ان يرزقك ماتتمنى وزيادة وان يقدر لك الخير حيث كان
واووعى تنسى لو بطلنا نحلم نموت
احلم يمكن يتحقق الحلم ونقول يااااااااااااااا ده كان حلم بعيد عليا قوى
تحياتى ليك
انا جاي متأخر شوية
لكن ملحوقة ...
انا بقى يا ستي أحلامي مش عاوز اقولها هنا
ومش عاوز اقولها لحد خالص
لكن قبل ده وده
في فرق بين الأحلام العامة والأحلام الخاصة
يعني ممكن انك تحلمي حلم لبلدك مثلا او حيك أو حتى عمارتك
وممكن تحلمي لنفسك وذاتك
والنوع الاول معروف طبعا احنا كلنا عاوزين فيه ايه
اما النوع التاني فكل ما أقوله ... في فمي ماء
تحياتي
الحمد لله
اخيرا لقيت حد بيفكر بشكل ايجابي
فيه مدونين لسه بدأين الكتابه ولم يعملوا شيئا بقلمهم ولا بفكرهم ولا بجهدهم
لم يفعلوا شيء
ومجرد انهم يرفعوا واقع فيلاقوه زفت
ميستحملوش
بدل ما يبدأ دورهم الحقيقي في رفع المعاناه والظلم
ويشاركوا في عملية التغيير تلاقيهم بوعي او دون معي منهم يدعوا الناس للياس
طيب ما تقعد في بيتك احسن وتحط لسانك جوا بقك الناس مش ناقصة
ربنا يكرمك فعلا احنا محتاجين امل محتاجين نحلم حلم جميل ونسعي كلنا نحققه
ومعانا موعود ربنا
انه لا يضيع اجر من احسن عملا
مرة تانية ربنا يكرمك
واوعدك احلم وسيتحول الحلم حقيقة يوما ما كاجمل ما تكون
لا اعلم كيف يعيش المرء بدون ثلاثة اشياء غذاء القلب وهو الايمان بخالق الاكوان تعالى عما يشركون وغذاء العقل وهو العلم وغذاء الاثنين معا القلب والعقل وهو الحلم والفكر لان الحلم بامل وتبسم يعنى فرحة وانتعاشة القلب والحلم بمرتبه علميه معينه يعنى غذاء وانتشاء العقل هذا والله اعلى واعلم
لا اعلم كيف يعيش المرء بدون ثلاثة اشياء غذاء القلب وهو الايمان بخالق الاكوان تعالى عما يشركون وغذاء العقل وهو العلم وغذاء الاثنين معا القلب والعقل وهو الحلم والفكر لان الحلم بامل وتبسم يعنى فرحة وانتعاشة القلب والحلم بمرتبه علميه معينه يعنى غذاء وانتشاء العقل هذا والله اعلى واعلم
لو بطلنا نحلم نموت ، بس وانا بحلم لازم احلم حلم عل قد امكانياتي وظروفي علشان الحلم لا يتحول الي كابوس يزعجني ويبعثر افكاري اما بخصوص الاحلام فعلي المستوي العام اتمني تحرير القدس والصلاة في المسجد الاقصي ، المستوي العائلي اتمني ان يكون ابي من المرحومين والمغفور لهم وان يكون رحمه الله توفي وهو راض عني ، وان يبارك الله لي في امي وصحتها ويبارك لي في اخوتي وخصوصا الصغيرة قصدي اخر العنقود ، المستوي الشخصي ، احمد الله علي الزوجة الصالحة( نعم الزوجة ) بارك الله لي فيها واعانهاوالاولاد اسال الله ان يبارك لي فيهما يوسف ومريم وان ينبتهم الله نباتا حسنا
اخوكي الكبير
كلام مهم اوى ياامانى
المفروض فعلا الواحد ياخد كوبى
ويكتب احلامه
وكل فتره يروح ليها
يشوف ايه اتحقق وايه لسا
انا عن نفسى بتمنى مستقبل كويس لاولادى
لانى مش ضامن اعيش ليهم
فا بحاول اامن ليهم مستقبلهم
تحياتى اختى الجميله امانى
اخيكى احمد سكر
كمان عشرين سنة
انا هاخد جائزة الام المثالية
علشان عرفت اربى ابنى صح لانه ساعتها هيكون عنده اربعة وعشرين سنة وهيكون حاجة كويسة اوى
وهيقول انى انا صاحبة الفضل عليه بعد ربنا طبعا
فبالتالى هاخد جايزة الام المثالية
او ممكن تلاقوا صورتى ومكتوب تحتها
الكاتبة المتميزة نوران الشاملى تحتفل بزفاف نجلها شريف على عروسه
ديدى جمال مبارك
ابنة الرئيس جمال مبارك
او حفيدة الرئيس حسنى مبارك
ربنا يدينا ويديله طول العمر
بس انا اتمنى انكم كمان عشرين سنة
تقروا فى الجرايد
الذكرى السنوية العشرون
للشهيدة نوران الشاملى
شهيدة ايه؟ معرفش
بس نفسى اموت شهيدة
مش هتفرق بقى شهيدة ايه
بس يا سلام لو اموت شهيدة فى سبيل الله
او الوطن
تبقى شهادة عشرة على عشرة
اروح فيها على الجنة حدف
من غير اى حساب
بس خلاص
بت خيخة وأى كلام
انا اعلق بعد خيخة ينفع كده يا ربى
تعليقها تحفة وخلينى ميت على نفسى من الضحك
المهم نرجع للبوست
البوست فكرته رائعة جدا
واحلام مشروعة طبعا
احلام بعد 20سنة يااااه احلام طويلة الاجل
على المستوى الشخصى نفسى ابقى انسان ملتزم فى عبادتى وعملى وعلاقتى بالاخرين
وانى اساعد المحتاجين واعمل مشاريع خيرية ثوابها يظل بعد ما اموت
على المستوى العائلى
نفسى اخلى اسرتى سعيدة ومش ناقصها اى شىء واعلم همس واخواتها واربيهم تربية صالحة واغرس فيهم حب الدين والوطن
اما على المستوى العام
نفسى مصر تبقى احسن دولة فى الدنيا وشعبها يفضل خير اجناد الارض
وحكامها يقيموا العدل ويحكموا بشرع الله ويتقوا الله فينا وفيها
وانا بصراحة متفاءل خير
واثق من نصر الله
وان القدس ترجع لينا والفلسطنيين يرجعوا ارضهم
والعرب يبقوا دولة واحدة
احلام اتمنى انها تحقق كلها
قولوا اميين
تحياتى
خالد
ابو مالك :صاحب المضيفة
ماشي ياسيدى براحتك
مش مهم تقولها ومش مهم طبعا حد يعرفها
بس الاهم انها تكون موجودة
ونحاول فعلا نعمل عشانها ونوصلها باذن الله
ربنا يكرمك يارب ويحققلك كل احلامك
دمت بكل الخير
فهد
ربنا يكرمك يااخى على اطرائك الجميل لي
وفعلا اللى انت ذكرته ده موجود
بس اكيد لازم نفضل نحلم عشان نقدر نتعايش مع الواقع بكل مافيه
رزقك الله ماتتمنى وزيادة
دمت بكل ود وخير
كاتب سابق
جزاكم الله خيرا على هذا الربط الجميل رزقنا الله واياك حسن العمل واليقين بموعود الله لنا
تحياتى
دمت بكل الخير
الغالي ابو يوسف
عندك حق لازم نحلم على اد امكانياتنا وظروفنا بس المهم نحلم ونسعى لحلمنا ونعمل اللى علينا
:)
ربنا يكرمك ويحققلك احلامك ويباركلك فى زوجتك واولادك
وكل الاسرة طبعا
وخصوصا خصوصا اخر العنقود
:)))
ومش يحرمك منها يارب
دمت بسعادة وهنا
سكر
والله ده شئ جميل ومهم جدا لو نفذناه يا احمد
ربنا يكرمك ويباركلك فى اولادك
ويخليك ليهم يارب
تحياتى ليك
خوخة
اخيييييييييرا شوفتك
احلامك جميلة وربنا يارب يحققهالك ياخوخة
انا مش مستغربة بس غير انك عاوزة شريف يتجوز حفيدة الريس
ياشيخة شوفي حد يريحه احسن
:)
ربنا يارب يرزقك ماتتمنى وزيادة يا ام شيكو
همس الاحباب
معلش يااستاذ خالد
انتوا هتعملوا زى ناس فى التعليقات دى ولا ايه
:)
جميل قوى ان الكل مهتم فى احلامه باولاده وتربيتهم على حب الدين والوطن
بجد هما دول الامل وربمنا يكرمك يارب ويبارلك فى همس واخواتها
ويرزقك ماتتمنى وزيادة
تحياتى ليك
أنا نفسى أكون طبيب ناجح رافعا لراية الإسلام
وبذاكر علشان أوصل لكده
بس المؤشات بتقول ان اللى جى أسوء
لا يأتى زمان إلا وبعده شر منه
تحياتى
السلام عليكم
بصى
الموضوع جميل
واجمل مافيه عملنا ايه علشان احلامنا
لانها مش هتحقق لوحدها
بحلم اتخرج واشتغل
مفيش احسن من مريض يشكرك بعد ميتعالج
فبقول يارب ابقى دكتور كويس
funkydoctor
اهلا بيك في زيارتك الاولى ليا
خلي عندك امل وطول مافي اصرار باذن الله ربنا يكرمك وتحقق احلامك
دمت بخير واتمنى دوام التواصل
abo7anaf
جميل قوى الحلم اللى يرتبط بعملنا ومهنتنالانك بكده هتكون ليك اكبر الاثر فى المجتمع
لما نلاقي دكتور شاطر ومتميز فى اخلاقه ومعاملاته
بجد بتبقى حاجة تشرف
ربنا يكرمك وتحقق كل احلامك
بس المهم نعملها من دلوقتي
تحياتى ليك
يااااااه
ده على كده الواحد مش هيكفيه يرد هنا
ده ابقى اكتبهولك وابعتهولك
انما مختصرها اللى كتباه في تعريفي عن نفسي وهو
عندى يقين إنى هفتح عينى هلاقى حلمى بمصر أحسن بلد فى الدنيا اصبح واقع...... لأن حلم الأمس بالبلورة السحرية ... أصبح واقع اليوم التلفزيون..... وحلم الأمس بالبساط السحرى ... أصبح واقع اليوم الطيارة
بجد جزاكى الله خيرا على تدوينك الجميل ده
وانا هجاوب اتمنا من كل قلبى راحه والدتى الاول وبعد كدا رضا الله عنى وتالت حاجه انى احج وتالت الحاجه اتمنا لو كان مصيرى طيب واتمنا لو زورتينى وتشرفت بيكى فى مدونتى والسلام عليكم
ايه يا اماني بتعملي بوست كل شهر
ايه التاخير ده كله , كل شويه اخد مواصله مخصوص للمدونه بتاعتك وملقكيش نزلتي بوست جديد !!!
بطلي تاخير بقي مممممم
بنت ابيها
منورانى بجد دايما
وفعلا احلامنا ممكن مانقدرش نكتبها هنا
بس المهم تكون موجودة ونسعى عشانها
رزقكى الله ماتتمنى وزيادة
سعيدة بزيارتك ومرورك الدائم
دمت بكل الخير
آدم المصرى
اهلا بيك في زيارتك الاولى ليا
ومنور عالم التدوين
امنيات بسيطة وجميلة ربنا يحققهالك
ويرزقك ماتتمنى وزيادة
سعيدة بمرورك واتمنى دوام التواصل
الفارس الملثم
معذرة على التأخير والله
فترة كده وتعدى على خير دعواااااااااااتكم
ومعلش يامحمد المواصلات عليا
:)
انا عارفة انى بقيت بتاخر فى البوستات
بس ان شاء الله مش تتكرر كتير تانى
دمت بكل الخير
وجزاكم الله خير على المتابعة والسؤال
Post a Comment