Sunday, March 9, 2008

دعوة لإيقاظ العقــــول


لاشك أن من المتعارف بيننا أنه كلما كانت شخصية الفرد أقوى وثباته على مبادئه أشد كان أهم فى الحياة ... رغم ما يتعرض له من انتقادات أحيانا من زملائه والمحيطين به واتهامهم له بعدم المرونة "وعدم تمشية الحال" إلا أن مشاعرهم الداخلية تؤمن أنها امام بطل قل وجوده هذه الأيام..


فقد يكون من مبادئك عدم أخذ الرشوة ...مهما زينوا أسمائها "بقشيش".."هدية".."عمولة" ...فعدم قبولك للرشوة يغضب المرتشين.


وهناك زوجة من مبادئها عدم الكذب على زوجها مهما غيروا المسميات لها "تمشية حال"..كذب أبيض"..وامتناعها عن الكذب يغضب الفاعلات.


وغير ذلك من المبادئ التى ترسخت بداخلنا منها الايجابى وآخر سلبى من الأهل والأصدقاء وجميع المحيطين بنا ... وكل هذه المبادئ بالتأكيد تلعب دور هام وفعال فى تكوين شخصية الفرد حتى تصبح جزء لا يتجزأ منه ويبدأ فى تطبيقها فى تعاملاته مع كل المحيطين به.


ولاشك أيضا أن الاعلام والفن له النصيب الأكبر فى هذه المبادئ التى ترسخ فى العقول فكما هناك الكثير من البرامج المفيدة التى تذاع على هذه الشاشة ، فهناك أيضا الكثير والكثير من البرامج المدمرة للقيم والمبادئ الجميلة التى دائما ما تحلو بها الحياة


بداية من برامج الأطفال... إلى ما نشاهده نحن من برامج .

تخيل معى...كم يقضى أطفالنا أمام القنوات المخصصة لهم من ساعات وما مدى تأثير هذه الأفلام عليه وعلى فكره وسعيه دائما فى تقليد ما يشاهده؟؟؟؟


تخيل معى ....كم الأغانى والرقص والحب والإيحاءات السلبية التى تبث إلينا من خلاله يوميا؟؟

فبدأنا فى تشرب الكثير من المبادئ السلبية والتى تؤثر على تكوين شخصياتنا.


ومن أمثلة هذه المبادئ :

** مبدأ الرجولة ** والذى أصبح بكل آسف يعنى لدى الكثير من الشباب "إنك لازم تجرب كل حاجة"ولو أنت مش كده تبقى "ولد فرفور" يعنى يجرب يشرب عشان منظره قدام اصحابه ،ويصاحب عشان رجولته.


**مبدأ أنا لو سامحت الناس هأخد على دماغى ** وده للأسف قتل جوانا حب الخير ومعنى انى ازاى اسامح الناس واعيش بحب ورحمة

لكن دلوقتى" لازم انى أخد حقى بدراعى" عشان ماحدش "يستهيفنى"


**مبدأ الشيطان شاطر**وده بقى بيعودنا على عدم الرضا وفى الأخر "نتلكك " بأن الشيطان شاطر

وهوه مش شاطر إلا فإنه يبعدنا عن ربنا.


**مبدأ لو ما صحبتيش مش هتتجوزى** وآآه بقى من ده مبدأ!! مين قال كده بس ..دى أقل حاجة هتفقد احترامها من كل اللى حواليها وده ابسط حاجة ممكن تتعرض لها.


**مبدأ الدين مش بيدخل فى كل حاجة وان الدين يسر وليس عسر** حتى ده بقينا بنفهمه غلط الدين يسر يعنى نحبه لان ربنا ميسر لنا كل الطاعات و أعمال الخير...مش إننا نفهمه بأن الواحد مايكونش بيصلى ويقول "ياجماعة ما تعقدوهاش الدين يسر وليس عسر " ياريتنا نركز شوية ونفهم الكلام صح "لأننا هنتحاسب على كل كلمة.


**مبدأ أنا مفيش فايدة فيا ،الحال مش هتغير، أنا مش هغير الكون** طيب ممكن حد يقولى ليه مفيش فايدة ؟؟ ليه مش ممكن انك تغير الكون ؟؟ ليه الحال مش ممكن يتغير؟؟ والله ده ممكن كله يحصل بس لو إحنا اتغيرنا وغيرنا من نفسنا


يقول الله تعالى " إن الله لا يغير ما بقوم حتى يغيروا ما بأنفسهم"

يعنى ابدأ وكل واحد فينا يبدأ وبكده بجد ممكن الحال يتغير لازم نغير من نفسنا ومن مبادئنا اللى اتعودنا عليها وهيا غلط و مش صح و بتقتل جوانا الخير عشان نقدر نغير الواقع على المستوى الفردى وعلى مستوى الأمة


أتمنى أن نتخلص من بعض هذه المبادئ التى تبنيناها وتتكرر ونسمعها كثيرا وللأسف نرددها ونتأثر بها

وأوصى نفسى وإياكم أن نقرأ هذه الكلمات ونعيد قرأتها مرة أخرى بنية التغيير

وسأجدد النية معكم بتغير هذه المبادئ التى ترسخت فى عقولنا

ونوقظ هذه العقول من غفوتها حتى ننعم بحياة تملؤها الرحمة والمودة ورضا الله عز وجل...


وللحديث بقية....

68 comments:

صاحب المضيفة said...

أول تعليق المرة دي

حجز وراجع

صاحب المضيفة said...

جميلة هي المبادئ الطيبة إن غرست فينا من البداية

والأجمل أن يغرس فينا حبها والتضحية من أجلها لتظل شموعا تضيء لنا الطريق

كالعادة مبدعة ومتميزة

زادك الله علما ونورا من فضله

دكتور حر said...

سلاماتي

المشكل الاساسي في هذا الأمر هو تسمية الاشياء بغير مسمياتها حتى تتزين للناس

وللاسف وقعنا في دائرة الحلال غير الحقيقي والحرام غير الحقيقي

المباديء الان أصبحت بالتعود وبالتذكر
وان كانت في الاساس يجب ان تكون من التربية

الله ينور عالموضوع
ونسأل الله ان نعمل بما فيه

عصفور المدينة said...

فتح الله عليك وأقترح أن يتم التفصيل أكثر في الكلام على كل نقطة مما حوته هذه التدوينة الشاملة

سارة درويش said...

بعد المبادئ اللى ذكرتيها غلط من ساساها لراسها فعلا زى لو ما صحابتش مش هتجوز وكده ، لكن بعض المبادئ التانية صح بس بتتفهم غلط ، زى مبدأ الرجولة ومبدأ ان الدين يسر .. جزاكِ الله كل خير وفى انتظار البقية يا قمر

semsem said...

يا خسارة مش اول تعليق
:(
بجد حلو الموضوع فعلا
وهااااااااااادف جدا
كالعاده مش جديده عليكى يااخر العنقود
دايما متميزة
وعسووووووله كمان
:)

عايز أتعلم said...

جزاكي الله خيرا

موضوع جميل بجد ومبادئ فعلاً لازم تتفهم صح ..مش الفهم اللي معظمه عند الناس ده

وبعدين موضوع انا لوحدي مش اقدر اعمل حاجة ده ....مين قال كده ؟؟؟؟؟
امال ايه لازمة العمل الجماعي بقى

بجد ادعوك وادع كل اللي بيقرو في مدونتك يقراو كتاب في رحاب الاسلام ..الجزء الثالث
ل أ-حسام حميده

فعلاً... لو المبادئ دي اتغرست فينا من صغرنا ومشينا بها صح ..هنفلح دنيا واخره

وجزيتي خيراً

david santos said...

Excellent!
Very, very good.
Thank you.

قبلة الحياة said...

ما شاء الله ولاحول ولا قوة الا بالله

ربنا يبارك فيكي يا عنقوده يا جميله

اكتر مرحله لازم نخلي بالنا منها هي مرحله الطفوله لان الطفل بيتشرب كل شيء الحلو والوحش وهو لسه مخه مش مدرك الصح من الغلط

انما الشباب اغلبه عنده وعي بالحلال والحرام واللي يصح واللي ما يصحشي

وربنا يرزقنا الخير والعمل الصالح وكل ما يرضاه

جزاك الله كل خير اختي الفاضله وخالص احترامي لفكرك المميز

3ala asm masr said...

فعلا ان الله لا يغير ما بقوما حتى يغيروا ما بأنفسهم
لازم نتغير عشان كل حاجه حوالينا تتغير

Abd El-fatta7 said...

السلام عليكم

ماشاء الله الموضوع متميز جدا ..ولمس نقطة مهمة اوي ..المبادئ اللي بتكبر جوانا من غير مانشعر واللي تكرارها بيخليها كانها هي الصح عند معظم الناس


الاعلام كمان زي ماحضرتك قولتي ليه دور مهم


الحل بقي من وجهة نظري هو منهج القران وسنة الرسول صلي الله عليه وسلم

لو كانت طباعنا ومفاهيمنا تبعا لما جاء به كل حاجة ح تتظبط طبيعي

جزاكم الله خيرا

ahmed fala said...

موضوع ممتاز ممتاز ممتاز

بصراحة احنا بقينا بنطلع لنفسنا حجج تافهم
ليس لها اصل علشان نعمل الغلط

ولابد من ان يكون لهذا الموضوع اساس الا وهى التربية من البداية على الصراط المستقيم

واتمنى فى بقية الحديث انشاء الله ان تتناولى هذة النقاط بوضوح اكثر

وجزاكم الله خيرا على هذة التوعية

الفارس الملثم said...

طبعا كلامك صح تماما , ربما من اسباب بعض التصرفات الخطأ التي ذكرتيها محاولة البعض تبرير الخطأ حتي لا يشعر بتانيب الضمير

فهذا ياخذ رشوة بحجة المعايش صعبة وهذا يكدب لكن يبرر لنفسه ان هذا كدب ابيض وغير ذلك من التبريرات

وربما يحضرني هنا حديث لرسول الله صلي الله عليه وسلم فيما معناه لا يجب ان تكون كالامعة فتفعل الخطأ وتقول افعل مثلما الناس يفعلون ..

موضوع متميز كالعادة اخر العنقود

تقبلي مروري

Anonymous said...

جزاك الله خيرا يا حبيبتى
كالعادة موضوع جميل منك
فعلا فى كتير من المعتقدات اللى اتربينا عليها وفهمنا انها الصح بلا نقاش
ومنها الصح فعلا بس كتير منها غلط
زى مثلا ( لو اتحجيبتى مش هتتجوزى ) وكمان (لو التزمت مش هتلاقى حد يكلمك وكل الناس هتخاف منك )...............وكتير بقى متعديش على العموم منتظرين منك المزيد


اختك

آخر العنقود said...

الكريم /ابو مالك

اخييييييييييرا نورتنا

هيه فعلا التضحية
بس عشانها... مش بيها
:)

دمت بخير وود

آخر العنقود said...

دكتورنا الحر

فعلا بقى فى حاجات كتيرة جدا حرام وبيحللوها بتغير اسمائها
"ان هى الا اسماء سميتموها انتم وابائكم ما نزل الله بها من سلطان"

كلامك فى السلييييم

دمت بخير وسعادة

آخر العنقود said...

استاذنا /عصفور المدينة

ربنا يكرمك يارب

واقتراح حضرتك جارى العمل به باذن الله

جزاكم الله كل الخير

آخر العنقود said...

s@rora

منورانى بزيارتك الاولى ويارب مش الاخيرة
وجزيتى من الخير الكثير

وهيا دى المشكلة فعلا الفهم الخاطئ لتير من مبادئنا الجميلة

تحياتى ليكى

آخر العنقود said...

سمسم

معلش ياسمسم هبقى احجزهولك
:)

ربنا يخليك ياقمر
دعواتك دايما

اختك

آخر العنقود said...

عايز أتعلم

جزانا واياكم
فعلا انا متفقة معاك جدا ان العمل الجماعى حاجة بجد مثمرة ومشجعة
وزى مابيقولوا "ايد لوحدها ما تسقفش"


وابقى ادينا الكتاب وانا اقراه
:)

نسأل الله الاخلاص والعمل

آخر العنقود said...

david santos

thanks for your comment

آخر العنقود said...

قبلة الحياة

ربنا يخليك ياقمر

انا معاكى ان فى كتير من شبابنا عارف الصح واللى ما يصحش
بس انا اقصد ان تغيير وتزييف المسميات بتغيرهم وتبهرهم
وده اللى يخليهم يتخدعوا

زى بالظبط مبدأ الرجولة مثلا او ان الدين يسر
وده طبعا بسبب الاعلام الجميل اللى بيوصل كده للناس

تحياتى ليكى
ويارب تكون فكرتى وصلت

Anonymous said...

بسم الله ما شاء الله
ايه الحلاوة دى
دا العيلة كلها طلعت جامدة وانا معرفش
عقبالى يارب
موضوع جميل قوى وواقعى وبيحصل معنا كلنا وممكن يكون غصب عننا
مثلا وانت بتخلصى ورق معين من كليتك ممكن تتاخرى عن زميلك لو مشوفتش الساعى ده باى حاجة كده وطبعا دا مش صح بس بتقعدى تقولى لنفسك انا ماخدتش حق مش حقى ودا غصب عنى
وعلى العموم الواحد قدر المستطاع يحاول يحافظ على شوىة مبادئ جواه علشان حتى مايفقدش احترامه لنفسه


مواضيعك كلها جميلة يا صغىرة السن كبيرة العقل
ربنا يبارك فيكى ويرزقك الجنة

بنت عمك
الدكتورة العاطلة
نوووونة

آخر العنقود said...

على اسم مصر

منورانى ياهنودة
وربنا يرزقنا الاخلاص والقبول

تحياتى ليكى

آخر العنقود said...

عبد الفتاح

وعليكم السلام ورحمةالله وبركاته
منور بزيارتك الاولى ويارب مش الاخيرة

فعلا هوه ده الحل
من وجهة نظرنا كلنا
وده الصح طبعا
وباذن الله ده هيبان فى الباقى

تحياتى ليك

آخر العنقود said...

أحمد فلا

بالظببببببببببط احنا اللى بنتلكك
ونبطلع حجج لنفسنا
خد بالك اوى

وزى ما بتقول هو الطري المستقيم دايما صح
يعنى ولا يمين شمال ينفع

ولا شمال يمين ينفع

وباذن الله اقدر اوضح النقط
وجزاكم الله على خيرا على الكلام الطيب

تحياتى ليك

آخر العنقود said...

الفارس الملثم

منورنى دايما
جميل الحديث وفعلا للاسف كتير بيعمل كده ويقول هى الدنيا مش ماشية غير كده

مع ان احنا اللى بنمشيها والله
يعنى لو احنا بدأنا نغيرها هتتغيير

الناس كلها خدت على كده وللاسف من ضمنهم احنا

بس يارب نقدر نتغير ونغير دايما للصح

دمت بكل الخير والود

آخر العنقود said...

سمسمة

عندك حق والله
احنا لو عدينا اللى بيتقال من هذا القبيل مش هنخلص
وللاسف برده هنلاقى كتير مقتنع بيه وبينفذه من غير وعى ده صح ولا غلط
بس اهوه كله كده

ربنا يكرمك يارب
دعواتك

آخر العنقود said...

لالالالالالالالالالالا مش ممكن
والله ما مصدقة

بنت عمى الدكتورة العاطلة
:)
كلفت خاطرها وفتحت الكمبيوتر
وبتقرأ مدونتى
لا وكمااااااااااااااااااان بتسيب تعليق

يانهااااااااااااااااار ابيض جدعان
ده انا هعملك فرح
:)

وبعدين يانونة انتى لسه واخدة بالك ان عيلتنا كلها جامدة
عيب عليكى
لا صحيح عيب قوووووووووى
:)
ده مش شكر طببببعا

عندك حق يانونة فعلا احنا ممكن نعمل مواقف زى دى كتير
واسوأحاجة اننا بنقول غصب عننا

طيب بزمتك حد بيعمل حاجة غصب عنه
"بس بره العيلة"
:)
بس بنيجى فى دى ونقول غصب عننا
وتبقى وحشة اوووووى لوحصلت من حد ناس كتير بتبصله انه حاجة كبيرة

يالا ربنا يهدينا ونحاول نتغير ونحافظ على الحلو اللى جوانا

وربنا يخليك على كلمتك الجميلة دى ياسكرة
والله فرحتينى ويارب كده دايما تنورينى

دعواتك دايما

منوفيـــايــة said...

فعلا" تغير المفاهيم والمبادىء ده من أخطر مايكون
والتساهل بقى سمة اساسيه ف العصر ده
المشكلة كمان ان الناس بتبقى عارفه انه غلط وبيجادلوا ويزيفوا الحقيقة علشان تبقى على هواهم...ربنا بيقول
أَرَأَيْتَ مَنِ اتَّخَذَ إِلَهَهُ هَوَاهُ أَفَأَنتَ تَكُونُ عَلَيْهِ وَكِيلًا (43سورة الفرقان)
صدق الله العظيم
تحياتى ليكى تدوينه عاليه المستوى
ربنا يصلح الأحوال ويثبتنا يارب

همسة قلم said...

دي دعوة لاعادة المفاهيم الصحيحة يااماني الى النفوس قبل العقول

أصل لو قلنا العقل هايقولك انه تمشية الحال نوع من اعمال العقل :)

عجبني البوست جدا ياأمني خاصة الحالات اللى انتِ ضاربة بيها الامثال .. على فكرة .. احيانا بيكون ده أسلوب تربية كمان جوة البيوت ..يعني محتاجين اعادة تربية وتقويم وايقاظ وتنويم وكل حاجة :)

دمتِ متألقة يامنمن ..وبعدين الحقيقة يعني ..الصورة عجبتني جدا

من زمان نفسي اخد لقطة زي دي ..بس هايجيلها يوم :)

جهاد خالد said...

موضوع جميل يا أماني بجد

ربنا يحفظك

هتبقى سلسلة قوية ان شاء الله

متابعين

مثلية فقط said...

السلبية هي أسوء ما يمكن أن تكون عليه شخصية الإنسان
و انعدام المبادئ الصحيحة و الصدق و الضمير يعني انعدام إنسانية الواحد بالأساس

دخيلك مع مين عم تحكي عن المبادئ
نحنا للأسف مجنمع منافق كثير
ممكن نحكي و نعيد بس نمشي على ذات الطريق يلي تعودنا عليه

في فيلسوف بيقول : لا عقيدة أسمى من الصدق
تخيلي هيدا المبدأ لحالو بيكفي تعويض كل المبادئ يلي حكيتي عنها
الصدق مع النفس و الضمير و الأخرين

بتمنى لو كل واحد يجرب يكون صادق ليوم واحد فقط و يشوف قديش راح تفرق معو

تقبلي مروري
خالص تحياتي

فضفضة said...

موضوع هادف جدا

ربنا يبارك لك يارب

ومعاك حق من شب على شئ شاب عليه

ويارب نقدر اننا نزرع صح فى اولادنا

ربنا يفتح عليك ياااااارب

أحمد سعيد بسيوني said...

بسم الله
حي في قلوبنا
حملة طلاب طب طنطا لنصرة نبينا الكريم
www.aliveinourheart.blogspot.com
شارك معنا فـ"الحملة حملتكم"
تحياتنا

الربان said...

تحياتي

اولا احيك علي الموضوع...فعلا ان نمط التفكير السائد في المجتمع نمط سلبي بكل
ما تعني الكلمة...و هذا من إفرازات سوء التعليم و غياب دور الاسرة و المدرسة في التنشئة الاجتماعية للاطفال.

ثانياغياب القدوة الصالحة في حياة الابناء...زمان كان المرس قدوة لطلابه
والاب قدوة لابنائه....الان الموضوع انتهي لان القدوة الصالحة لم تعد موجودة.

ثالثا ..الشيطان لو كان شاطر لما طرد من الجنه....هو ، في رأيي ، اخيب مخلوقات الله...و سلطانه علي ضعفاء النفوس...و من لم يتسلحوا بالقرب من الله.

انها دعوة كريمة من حضرتك لتغيير فكر سائد...يبرر الخطأ و يفترض ان يكون الفكر السائد منع الخطأ قبل وقوعه.


تحياتي و تقديري.

الـسـيـدة نـون said...

بجد حتة بوست فى الجون يا نانا
لما بقعد احبكها شوية فى كل حاجة
ساعات هانى يقولى نتىمش هتصلحى الكون
بكون من جوايا مقتنعة انى ممكن اصلح الكون كفاية انى ازرع فى ابنى مبادئ انا مقتنعة بيها
وده نوع من انواع تصليح الكون
وبينى وبينك باخد على دماغى لما حد يغلط فيا واسامحه
بس بصراحة مش بيهمنى وبرجع اسامح الناس من تانى
بحس ان انا احسن منهم واقوى منهم
وساعات للاسف بعمل حاجات غلط وبتلكك ان الشيطان شاطر
وانا عارفة ان الشيطان مالهوش دعوة وان نفسى الامارة بالسوء هى اللى وزتنى على عمل الحاجات الغلط
ربنا يسامحنى يارب

باقى المفاهيم اللى انتى كاتباها انا بسمع عنها كتير وبشوفها حواليا فى اصحابى
لكن مجربتهاش بنفسى
تحياتى ليكى يا نانا
اختك خيخة

nigro said...
This comment has been removed by the author.
nigro said...

ما شاء الله و لا قوة إلا بالله
ربنا يبارك فيكِ يا آخر العنقود
بجد من أجمل المواضيع اللي قريتها من ساعة ما عرفت عالم التدوين
بالنسبة للكلام اللي بيقول الدين مش بيدخل فى كل حاجة
أنا كنت سمعت كلام رائع في الجزئية دي من الداعية مصطفى حسني
بيقول تخيل كده انك بتقول بالكلمة دي ان ربنا مش بيكون معانا في كل حاجة
و انه بعيد عن بعض الأمور
فالدين هو دستور و شرع الله في الأرض وبه تسير كل كبيرة وصغيرة
---------------------------------
لا إله إلا الله مالك الملك المسيطر على كل ما في الكون.. يعلم ما بين أيديهم و ما خلفهم
---------------------------------
كلام خطير جدا.. للأسف اللي بيقوله مش بيبقى عارف معناه
في انتظار باقي الحديث الممتع ده
---------------------------------
أرجو مراجعة الاية الكريمة
إن الله لا يغيّر ما بقوم حتى يُغيّروا ما بأنفسهم
انت نسيتي لفظة "لا".. وشكراً

اللؤلؤة المكنونة said...

هى مش دعوة واحدة هى دعوات لايقاظ الغقول

كلام جميل ومفيد
المشكل الأساسى هى تعود الناس على المبادىء اللى هى مش مبادىء أصلا واقتناعهم التام انهم كده ما بيعملوش حاجة غلط

المرجع للناس دلوقتى هم الناس التانية اللى عايشين معاهم
الرشوة بقت شىء عادى ويقولك الناس كلها بترتشى
الخيانة بقت شىء عادى ويقولك برضه الناس كلها بتخون


يعنى الناس بترجع فى تصرفاتها واعتقاداتها ومبادئها الى ناس زيهم
أو واقع بيفرض عليهم مثل هذه المبادىء

أو عادات وتقاليد وعرف الناس اتعودت عليه


يجب أن ننتبه جميعا
الى أى شىء نرجع أو نعتمد فى جميع شئون حياتنا
هل ارتضينا ان احنا مسلمين
يبقى لازم مرجعنا الأساسى يبقى الدين ولا شىء غيره

مش ناس تانية زيهم زينا
أو واقع متغير دائما
أو عرف لا يقبله الشرع

يعنى الواحد ما ييجى يكون مبادىء أو يفعل أى شىء يعرض الأمر الأول على الله ورسوله
ان وافق هذا الشىء رضا الله ورسوله كان بها
وان لم يوافق أقرب مقلب زبالة ويلقى هذه المبادىء فيها

هذا ما راودنى أثناء قراءتى لموضوعك
جزاكم الله خيرا
مع تمنياتى بوام التوفيق
مى

خمسة فضفضة said...

السلام عليكم ورحمة الله وبركاته

ماشاء الله
جزاكِ الله خير دايما مواضيعك متميزه وهادفة

ياريت كلنا ننفذ الدعوه دي وكل يوم الصبح نوقظ عقولنا قبل اجسادنا عشان ننعم بحياة تملؤها الرحمة والمودة ورضا الله عز وجل

تحياتي

إخوانى حتى النخاع said...

مباااااااادىء أكثر من راااااائعة


أخوكم إخوانى حتى النخاع
http://ikhwangeeee.blogspot.com

حزيــــــــــــــــــن said...

انا من الاشخاص التى كانت تستحى احيانا ان تحرج شخص
حتى وقعت فى موقف ان مددت لى فتاه يداها لتسلم على فوجدت نفسى اقول لها عفوا لا اصافح النساء
ومن هنا تعودت الا اخجل من الحق
الا انى احيانا كثيره انكر بقلبى ولا اعرف لماذا لا انكر بيدى
جزاك الله خيرا

جمعاوى said...

أنا مع رأى الدكتور محمد

" دكتور حر "

الأسماء و المسميات مشكلة رهيبة

ابو صهيب ( الجمعاوي الاصيل)سابقاً said...

بصراحة موضوع جميل جداص واتفق


مع دكتور حر تماماً

المشكل الاساسي في هذا الأمر هو تسمية

الاشياء بغير مسمياتها حتى تتزين للناس

koukawy said...

متزعليش مني ....بمناسبة الرجوله
كل واحد فاكر ان الرجوله، شرب سجاير،
و معاكسه، و ايحائات مش لطيفه، و مش شايف ان الرجوله ان لما يبقي الاوتوبيس زحمه و يفضل ملطوع علي الكرسي ما يقمش لست مفعوصه وسط الرجاله و يقعدها
و لا ان واحد شايله تقيل و ست كبيره انه يشيل معاها
و لا انه يغض البصر و يتلم و يبطل قلة ادب
هي دي الرجوله مش حاجه تانيه
انتي فعلا جيتي علي حاجات حساسه جدا
و كل واحد بيفسر علي مزاجه
ميرسي بوست حلو اوي

عبده الرايق said...

فعلا
اخر العنقود
ده مش طبعى ابدا
حكايه الرشوه دى
وانتى عارفه الحى واللى بيحصل فيه
بقشيش هديه عموله
نو
نو
والف نو

آخر العنقود said...

مستجدة

منورانى ياعسل
وكلام فعلا مظيوط
ربنا يعافينا ويثبتنا ياااااااااااااب

تحياتى ليكى

آخر العنقود said...

همسة قلم

يانهااااار ابيض ياجدعان
اخيرا افتكرتينا ياسمسمة
:)
عندك حق والله
خلاص ممكن نقول دعوة عامة لايقاظ كل حاجة
على رايك
:)

ربنا يخليك ياسكرة
ولو الصورة عاجباك اتفضليها والله ماتغلاش عليكى
على ما تصورى زيها وابقى اخدها منك
:)

آخر العنقود said...

النجمة الصامدة

يادى النور ياولااااااد
:)
ربنا يخليكى ياجوجو
ده بعض ما عندنا
يووووووه
قصدى ماعندكم
:)

جزيتى خيرا

آخر العنقود said...

فضفضة

منورانى فى اول زيارة ويارب تتكرر

ياريت نقدر نربى الاولاد على كده
اهوه على الاقل نضمن الجيل الجاى
على مانغير فى ده
:)

تحياتى ليكى

آخر العنقود said...

أحمد سعيد بسيونى

جزاكم الله خيرا
وان شاء الله سأشارك

تحياتى

آخر العنقود said...

الربان

اهلا بيك فى مدونتى المتواضعة
وفعلا انت ذكرت الاسباب فى وجود هذه العادات بينا وانتشارها
لان مفيش حد بيلاقى اللى يوجهه صح
غير نفسه واصحابه ودماغهم
وزى ماتيجى تيجى

اكرمك الله
واعاننا واياكم على التغيير الى مبادئ الاسلام

آخر العنقود said...

خيخة

برافو عليكى ياخوخة
لان ابنك هو ثروتك فى ايدك تبنيه وتبنى بيه وبايديك تدمريه وتدمرى بيه

اما مسامحتك للناس فصدقينى زى ماقولت هما ممكن يكون بيكابروا معاكى بس متاكدين انك صح وفخورين بيكى

انا مبسوطة جدا ياخوخة لانك بتقدرى تعرفى نفسك وتواجهيها
وده من اصعب بداية التغيير

تحياتى ليكى بجد
سلام
أختك الصغنونة

آخر العنقود said...

نيجرو

منور وزيارتك دايما تسعدنى
وربنا يكرمك على كلامك الطيب ده بجد

الكلام فعلا انا كمان سمعته من الداعية الشاب مصطفى حسنى
وده بصراحة اساس فكرة البوست

وجزااااااكم الله خيرا على لفت نظرى لخطأ الاية
وتم تعديلها فى وقتها يافندم

دمت بكل الخير والسعادة

آخر العنقود said...

اللؤلؤة المكنونة
مى حبيبتى

كلامك فعلا مهم جدا هوه ده تقريبا شرح الموضوع بكل بساطة
المشكلة اننا بقينا بنرضى باحكام الناس فحاجات المفروض اننا نكون عرفين احكامها

تحياتى ليكى ياقمر
وربنا يعينا ويثبتنا

آخر العنقود said...

خمسة فضفضة

منورانى دايما والله

كلمة حلوة اوى منك
نوقظ عقولنا قبل اجسادنا
شكرا ليكى يادكتورة بجد
وياريت ننفذ

آخر العنقود said...

إخوانجى حتى النخاع

اهلا بيك فى زيارتك الاولى

وجزاكم الله خيرا
وان شاء الله ازوركم قريبا

تحياتى ليك

آخر العنقود said...

حزين

بداية اهلا بيك فى زيارت الاولى

واحييك على معرفة نفسك ومواجهتها
واعتقد ان ربنا اكيد وفقك للثبات فى المواقف
لصدق نيتك

دائما اتسائل لماذا نخجل من الحق وهم لايخجلون من افعالهم؟؟؟؟؟؟؟؟

اعاننا الله واياك وبتنا على الحق دائما

آخر العنقود said...

جمعاوى روش طحن

فعلا المسميات والتزييف فيها من اكبر المشاكل اللى بتعرض الناس للاستسلام

تحياتى ليك

آخر العنقود said...

الجمعاوى الاصيل

وانا كمان بتفق مع دكتور حر
حد قال غير كده
:)

المسمياااااااااااااااااات وتزيفها للناس

آخر العنقود said...

كوكو

لا طبعا مش هزعل

لان فعلا ده موجود
بس منقدرش نعمم ده
لان فى برده النوع التانى والدنيا اكيد بخير... المشكلة ان زاد وكتر بس

ربنا يهدينا ويهديهم ياااااااارب
تحياتى ليك ومنور

وانا قريت عندك موضوع يفسر شوية من اللى هنا

آخر العنقود said...

عبده الرايق

ايه ده ايه ده
انا جيبت سيرتك ولا قولت كده
نو
نو
نو

الكلام ده طبببببببببببعا مش عليكى خالص يارايق
:)

تحياتى ليكى ياروقان

أحمد سعيد بسيوني said...

بارك الله فيكم

همس الاحباب said...

رائع جدا جدا يا اختى
كلامك رائع ومتميز
سهل ممتنع فى السرد والايضاح
ربنا يكرمك ويوفقك ويرشدنا لما فيه الخير اجمعين
ويكرمنا بتسمية الاسماء باسماءها الحقيقية
تحياتى ليكى

آخر العنقود said...

أحمد سعيد بسيونى

جزاكم الله خيرا
وبارك فيك

تحياتى

آخر العنقود said...

غربة وطن

جزاكم الله خيرا
وان شاء الله سنزوركم

تحياتى لكم

آخر العنقود said...

همس الاحباب

جزاكم الله خيرا على كلامك الطيب
ورزقنا واياك العمل بما نقول
ربنا يكرمك
ومنور دايما

تحياتى ليك