هكذا علمتنى..؟؟؟

مين فينا ما اتأثرش بشخصية كرتونية وحبها اوى

مين فينا مبيحبش مغامرة لذيذة من مغامرات توم ان جيرى

من فينا مش بيقعد يتفرج مع الأطفال الصغيرين وهما بيتفرجوا

على الكرتون.....قال يعنى بنتفرج غصب عننا

فى كرتون اسمه "نيمو" أكيد اللى شافه هيعرف كويس شخصية "دورى"

واللى ما شفش الكرتون ممكن يعرف شوية عنها فى البوست ده

دورى... دى سمكة جميلة جدا بجد الواحد اتعلم منها حاجات ولفتت

نظرنا لحاجات كتيير

دورى...كانت أكتر حاجة بتميزها طبيعتها وبساطتها وإنها دايما

على طبيعتها ووشها دايما بشوش

وكانت كمان تلقائية جدااا يعنى اللى فى قلبها على لسانها

ساعتها افتكرت ..الناس اللى دايما لابسة أقنعة وبتحاول تظهر على

غير طبيعتها وافتكرت كمان الناس اللى بتنافق وبتتجمل بس عشان

مصالح شخصية والناس اللى بتحب المظاهر بشكل مبالغ فيه

وبتخبى وراها شخصياتهم

دورى...كانت بتحاول تقدم كل اللى عندها وبتبذل أقصى مجهود

علشان تساعد المحتاج حتى لوده هيعرضها لمشاكل كتير

ساعتها افتكرت إن احنا بقينا فى زمن أغلب اللى فيه بيقول وأنا مالى

دورى ...كانت كل مشكلة بتقع فيها بتكون متأكدة انها هتخرج منها

دايما وكانت على يقين بأن كل مشكلة وليها حل وده المثل اللى كلنا

عارفينه بس فى أوقات كتير مش بنؤمن بيه

دورى ...كانت دايما عندها أمل ودايما بتبص للجانب المشرق

وعلى طول باصة للنص المليان

ساعتها افتكرت وسألت هوه ليه معظمنا بقى بيفكر ومش شايف

غير نص الكوباية الفاضى وبننسى النص المليان

دورى...أهم حاجة انها كانت على طول بتنسى وهى شايفة ان دى مشكلتها الوحيدة

لكنها كانت دايما بتنسى الإساءة وبتنسى اللى يأذيها وبتتعامل معاه

وكأن شئ لم يكن

ساعتها افتكرت الكلمة اللى بتقول "ليس المهم أن تنسى ولكن المهم أن تنسى أنك نسيت"

احنا دايما بنسامح الناس على أخطائهم فى حقنا بس تقريبا مش

بننسى ان احنا سامحنا الشخص الفلانى على الخطأ العلانى