"ده من عشمي"
الكلمة دى بقينا بنسمعها كتير فى كلامنا وفي مواقف مختلفة
ياترى يعنى ايه العشم؟؟يعنى ايه انى اكون متعشم في حد؟؟
يعنى لو قلت لصاحبك فلان زعلان منك عشان كذا .. وتلاقيه بيرد
طبعا بهزر "ده من عشمي فيه
يعنى تقول اللى تقوله وتعمل اللى تعمله .. وفي الآخر تقول .. ده من عشمي
طب ماقبل ماتزعل منه شوف ايه اللى زعله؟
مش يمكن يكون زعل من حاجة ياما نبههك
او حاجة انت عارف انه مش بيحبها
ممكن نفهم يعنى ايه عشم
هو العشم ده يخلينا نلغي اقل الآداب والذوقيات في التعامل بينا
مش معنى انى اتعشم فى حد انى الغي في تعاملي معاه الذوق فى الكلام
مش معنى انى اتعشم فى حد انى احمله اكترمن طاقته فى طلباتي ويمكن تكون
كمان على حسابه الشخصي وحساب حياته.. وده لاني عندي عشم فيه
مش معنى انى اتعشم فى حد انى ازعل اللى معايا بكلام او تصرف محرج
مش معنى العشم انى افضل دايما اخد من غير ما أدي
وده كله عشان انا عندي عشم فى اللى قدامي
ممكن قوى اللي قدامك مايقدرش يدي عشان مابياخدش
ماهوه كمان عاوز يكون عنده عشم فيك
عاوزك تفهمه وتقدره وترعيه في حاجته وطلباته وحريته وحياته
لو العشم هيخلينا نبعد عن الذوقيات والفروض في التعامل يبقى بلاش .. عشم
لو العشم هيخلينا نزعل أقرب الناس لينا يبقى بلاش .. عشم
لو العشم يخلينا نجرح ونخسر ناس بنحبهم قوى يبقى بلاش ... عشم
مش معنى كلامي أكيد أن مش يكون فى عشم بينا واننا نستحمل بعض
لكن بردوا
لازم نفهم يعنى ايه عشم؟؟
لو هتعشم وهراعي احساس ومشاعر اللى قدامي
يبقى حلو العشم
لو هتعشم وأدي كل واحد حقه فى كلمة شكر أو عمل خدمة
يبقى حلو
لو هتعشم ويكون معايا مبدأ التماس الأعذار
يبقى جميل العشم
العشم اللى هيخلينى أكون خايفة على مشاعر اللي معايا وأحاول بكل الطرق إنه
مايزعلش مني ،، وإني أجي على نفسي عشانه
يبقى ده حلو العشم
ومش تقول طب ما هوه مش بيعمل معايا كده
ابدأ أنت واعمل كده .. ومسيره يعرف ويقدر كل ده
وبلاش مبدأ العشم اللى بيخلينا نخسر أحب الناس لينا بحاجات بسيطة جدا
لو اتعملت مش هتضرني ومش هتكلفني حاجة
لكنها هتفرح اللى معايا وتسعده
خصووووووصا في وقت يكون اللى معايا محتاج لده فعلا
:
من عشمي فيكوا ان كلامي ده يكون مفهوم
:)))
