قررت أحط نقطة
وابدأ من أول السطر
:
مدونتك اتغيرت ليه؟؟
ولااتعيرت ولاحاجة ...مالها المدونة؟؟
لا موضوعاتك بقى فى حزن كتير ويأس
أنا ؟؟ طب إزاى ؟؟ أبدا عمرى مابحبه ولا بقتنع بيه
لا بس ده اللى واضح
غريبة ... لالا بس أكيد انتوا مش فاهمين قصدى فى اللى بكتبه
::
ده تعليق تم اكتر من مرة الفترة اللى فاتت مع بعض أفراد من العائلة الكريمة :)
وكنت فى كل مرة بقول لا مش يأس ولاحزن خاااااااالص
دى مجرد فكرة أو حدث معين بيحصل وبعبر عنه
وده كان فعلا اللى بيحصل
لكن بردوا الكلام كان فى بالى
لحد مافي يوم جالى تقريبا تعليق مشابه من خارج العيلة
قلت لاااااااا الموضوع شكله كده واضح للقارئ كمان
بغض النظر عن المعرفة الشخصية يعنى الموضوع مش موضوع قرايب :)
ومش بس الموضوعات
ده كمان فى بعض الصور اللى كانت شوية قاسية او عنيفة فى تعبيرها عن الموضوع
وطبعا حاجة تزعل لو حسيت إنك بتكتب شئ .. وبيتفهم شئ تانى
أو إن يوصل فكر معين عنك بعيد تماما عن الواقع واللى تقصده
وفى يوم حبيت اقرأ موضوعاتى القديمة وقلبت فى المدونة
بدأت احس ان كان في روح تانية خااااااااااااالص
يمكن كان فيها روقاااااااااااااااااااان أكتر
يمكن بقى فى خبرة شوية وتعاملات واحتكاكات زادت
حسيت بتغيير حاصل
سواء في الاسلوب او الافكارأوالنظرة نفسها
وطبعا عارفة ان التغيير ده ظاهرة صحية
لكن اللى لفت نظري فعلا
هوه التعليق المتكرر على اخر تدويناتى بالاخص الفترة الاخيرة
واكتشفت المشكلة
أنا مش من الناس اللى بتشجع الحزن واليأس والحياة السوداوية أبدا
بحب دايما الأمل والتفاؤل .. وهنحزن ليه ونتشائم أصلا ؟؟
فعشان كده كنت مستغربة جدا من التعليقات دى
لكن
فى افكار ممكن أكون عبرت عنها بشكل معين
تركت إيحاء بالحزن أو اليأس
يمكن أكون مش عرفت أعبر عن فكرتي بشكل أحلى وأوضح
يمكن الفكرة وقتها فى دماغى كانت لاتحمل غير المعنى اللى عبرت بيه
ومش تنفع غير بالشكل اللى خرجت بيه
احتمالات كتير
المهم أنها فى النهاية بتوصل بشكل سلبي غير اللى انا اتمنيته وقصدته
::
وعشان كده
قررت احط نقطة
وابدأ من أول السطر
وارجع بروح وروقان تدوينات زمان
مش عشان الاسباب اللى قولتها دى وبس
لكن لانى كمان حسيت باختلاف كبير
:)
دعواتكم
